Gagauziyanın uşak başçaları kabledeceklär gagauz dilini üürenmäk materiallarını
Gagauziyanın üüretim bakannıı kabletti gagauz dilindä didaktika materiallarını, angıları yakında daadılacȇklar avtonomiyanın uşak başçaların terbiedicilerinä hem okula hazırlamak grupaların terbiedilennerinä. Materialların tiparlanması için para Gagauziyanın bücetindän verildi.
Gagauziyada gagauz hem rumın dillerin birdän üüredilmesi uşak başçalarında başladıldıydı 2015 yılda.
Programanın ilk iki ȇtabında üüretmäk materialları verildiydilär 20 uşak başçasının büük grupalarına: üüretmäk kiyadı uşaklara, üüredicilerä hem analara – bobalara deyni; resimni kartoçkalar; gagauzça hem rumınca annatmaklar toplumnarı hem gagauzça hem rumınca türkülär toplumnarı.
Programanın üçüncü etabı için АNТЕМ uzmannarı yaptılar okula hazırlamak grupaların terbiedilennerinä didaktika hem metodika kiyatlarını. Hep o vakıt işledildi rumin dilini üüretmesi için kurrikulum küçük milletlerin ana dilindä üürenän uşak başçalarına deyni hem onu giriştirmesi için gid orta, büük hem okula hazırlayan grupalarında.
2018 yıldan okula hazırlayan grupaların terbiedilenneri üürenerlär rumın dilini kullanarak rumınca didaktika materiallarını, o zaman, açan gagauz dilindä dä posobiyalar hazırdılar, ama tiparlanmadıydılar. Gagauz dili üüredicileri onnarı kullanardılar ȇlektron formatında, ne zoorladardı onnarın işini.
Bu duruma bakarak Gagauziyanın Bakannık Komiteti aldı karar doorutmaa bücettän bu uura para da gagauz dilindä posobiyalar tiparlandılar.
Onnarın arasında:
- Gagauz dilindä posobie uşaklar, üüredicilär hem analar – bobalar için;
- Gagauz dilindä işlemäk tefteri;
- Gagauz dilindä legendalar hem annatmaklar toplumu;
- Gagauz dilindä şiirlär hem türkülär toplumu.
Läzım nışanamaa, ani 2020 yıln Büük ayın 1-dän Bakannık Komitetin kararına görä “Uşak başçalarında birkaç dillerin birdän üüredilmesi Programası” için, hepsi uşak başçalarında gagauz hem rumın dillerinä üüretmäk proţesi yapılȇr birtürlü programaya görä. Onu kurdu Moldovanın Evropalı trenerlerin milli assoţiaţiyası.
Источник grt.md 14.03.2022