Çok-Maydan küüyünün yaşayannarı susuz kaldılar. Buna sebep ne oldu?
Suyun etişmemezlii artık oldu bir problema Çok-Maydan küüyündä. Birkaç yıl sıravardı ev çorbacılıklarına su etişmeer. Su azalmasının beterinä yaşayannar başladılar danışmaa bu soruşlan kuvetlerä. Küüdä bulundu bizim çekim grupamız.
Yakın iki afta susuz. Çok — Maydan küüyünün yaşayannarı şansora 10 gündän zeedä bölä yaşȇȇrlar. Hem neçin küüyüdä kestilär suyu bilmeerlär.
“Yok su hiç, yaamur yok, bezbelli o üzerä”.
“Bir gram su akmêêr, ne bir çay koyasın, ne da uşakları yıkasın, hiç fit akmêêr”.
“Soluk kolvererlär, ama su yok, okadar ki ödemää lääzım”.
Primarın Georgiy Gorelkonun laflarına görä, bölä olay şansora üçüncü yıl sıravardır olȇr o beterä, ani insannarın evlerindä tepliţaların sayısı zeedelener.
“Biz bu derdi artık birkaç yıl sıravardı çözmää savaşêrız, ama yıl-yıldan taa zeedä tepliţa edenerlär. Geçti ay bir ev sade 120 ton harcamış, ama herbir ev 40-50 ton harcȇȇr, 10 evin normasını”, — haberledi primar.
Çok — Maydan küüyüdä beş artezian pınarı var. Onnar bütün küüya, neredä bir bin yaşamak evi var, su vererlär.
“Biz düşüneriz limit koymaa su kullanmasında. Şindi bizdä ev çorbacılıkları 12 ley bir kub su için ödeerlär, ama iş adamnarı 36 leya suyun kubometrasını satın alêrlar. O üzerä düşündük, ani herbir evä su limidını kurmaa 20-30 ton, bu sayıdan taa zeedä harcarsalar, ozaman kalan harçları iş adamnarı gibi ödesinnär 36 ley”, — söledi primar.
Hem taa bir önemli iş. Küü yamaçta bulunȇr da o evlerdä, angıları aşaada bulunȇrlar, su herzaman var, ama onnarda, angıları yukarda yaşȇȇrlar, zeetlenerlär. Ama olmêêr ölä, ki bütün küüyüdä su olsun.
Küüyün yaşayannarı kirez ayın 29-da pay aldılar küü sovetin oturuşunda. Problemanın çözümnerindän biri olarak teklif edildi suya limit koymaa. Sovet azaları kablettilär kararı kurmaa komisiyayi, angısı işlettirecek eni paaları suya, alarak esaba hepsi izmetlerä paaların kalkmasını.
Источник grt.md
