Çadırda Pötr Kazmalı adına okulunda açıldı bulgar dili klassı
Hederlez ayın 24-dä Moldovada hem başka slavän devletlerindä nışannȇȇrlar Slavän yazısı gününü. Bu yortuda Çadırdakı Pötr Kazmalı adına gimnaziyasında Slavän yazısı günündä açıldı bulgar dili klassı.
Slavän yazısı günündä anȇrlar Ayozlu Kirilı hem Mefodiyi, angıları kurdular slavän alfabetini. Bu gün Çadır muniţipiyasında Pötr Kazmalı adına gimnaziyasında eni bulgar klassı açıldı Bulgariya elçiliin yardımınan. Gimnaziyanın üürenicileri sevinerlär, ani onnarda olacek kolaylık eni klassta bulgar dilini üürenmää.
Üüredicilär nışannadılar, ani eni klass taa üüsek uura yardım edecek üürenmeyi kaldırmaa.
«Bu klassta var nicä üürensin 50 üreniciya kadar, burada üürener diil sade bulgarlar: ruslar, ukrainnär, moldvannar, angıları gagauz dilini bilmeerlär, gelerlär bizä bulgar dilini üürenmä. Bu yardım eder uşaklara üürenmää başka halkın adetlerini, kulturasını. Uşaklar büük havezlän üürenerlär hepsini, ne biz onnara vereriz», — söledi bulgar dili üüredici Anjela Lambova.
«Mobilyaları diiştirdik klassta, eni tehnika, stendlar var. Pek önemli, ani açıldı böla klass, uşaklar kendi bilgilerini taa üüsek uura kadıraceklar. Onuştan hepsinä büük şükürlär, kim yardımcı oldu bu proekti ilerletmää», — söledi P. Kazmalı adına gimnaziyasının başı Diana Räbaya.
«Şükür ederim elçiliimizi, onnar hep bizimnän bilä. Saa ol isteerim sölemää müdürlerä, üredicilerä, kim üüreder uşakları, zenginnederlär onnarın bilgilerini. Tanıştırêrlar uşakları bulgar dilinnän, adetlärlän», — nışannadı Gagauziyada Bulgarlar cümnesini temsil edän Tatyana Rakovçena.
Источник grt.md
