Büük Britaniya yardım eder Gagauziyanın üüretim kurumnarına
Büük Britaniyanın elçisi Moldovada Stiven Fişer tanıştı Gagauz avtonomiyasınnan. Komratta diplomat buluştu Gagauziyanın başkanınnan. Elçi baaşladı kiyat hem bilgi-metodika literaturası partiyalarını üüretim kurumnarına. Hep ölä Stiven Fişer dolaştı Komart devlet universitetini hem baş kasabasının 8-ci uşak başçasını.
Kiyatları, sözlükleri hem englez dili bilgi metodikalarını Britaniyanın temsilcisi Moldovada baaşladı avtonomiyanın üüretim uuruna. 400 tipar yardım edeceklär bu dili üüredän uzmannara.
Üüredicilär nışannadılar, ani bu kiyatlar pek lüüzımdı onnara iştä, çünkü uşaklar bu dilin êkzamennarını vererlär Bakalavra uurunda. Britaniyanın büük elçilii Moldovada hep ölä verer kolaylık üüredicilerä bilgilerini üsek uura kaldırsınnar maasus kurslarlan.
“Britaniyanın Büük elçilii herzaman yardım eder, kursları kurdu. Büün uydu, da buluştuk büük elçiylän. Çok sevindik, ani verdi hem baaşladı okullarımıza bu kiyatları. Elbetki, devletin dilini üüredärkan ii olur, memleketin da olsun tertipleri burada Moldovamızda”, — söledi englez dili üüredicisi Galina Mutkoglo.
Üürenicilär nışannadılar, ani büük havezlän üürenerlär bu dili, eni literatura sa taa genişledecek kabledilmiş bilgileri. Onnar gösterdilär bilgilerini Britaniyanın ilçisinnän englezça lafedip, hem paylaştılar çekim grupamızlan dil üürenmesindä başarlarınnan.
“Bizä taa kolay olacek artık bu kiyatların yardımınnan üürenmää. Bizim zorluumuz vardı bu uurda, ama şindi elbetki mutluyuz. Taa ii kolaylıklar da olaceklar üürenmektä”.
“Bizim laf bilgilerimiz zenginnenecek, yardım verecek diil sade bana, ama hepsi studentlerimizä üürenmää englez dilini. Gittikçä da başka devletlerä, neredä bu dildä lafederlär, taa ii annayacez ,ne söleerlär oralarda insannar”.
Stiven Fişer hep ölä dolaştı Komrat kasabasının 8-ci uşak başçasını, tanıştı çok dilli üürenmäk sistemasınnan. Terbiedicilär hem uşaklar hazırladılar programayı türlü dillerdä. Büük elçi verdi baaşışları uşaklara.
İnteraktiv tablasını Büük Britaniyanın elçisi verdi Komrat Devlet Universitetinä, ki geçirsinnär taa ilin englez dilin derslerini. Stiven Fişer nışannadı, ani zamandaş tehnologiyalar yardım edeceklär üürenmää üüsek uurda dili.
“Universitetiniz meraklandırdı, siz bana deyni ayırı bir auditoriya. Biz savaşêrız yapmaa en ii ne var, ki ilerlesin dilimiz sizdä da. Sevindirdi hem şükürüm hepsi studentlerä, kim lafeder dilimizdä”, — söledi Büük Britaniyanın elçisi.
KDU rektoru Sergey Zahariya söledi, ani Gagauziyanın tek üüsek üüretim kurumu baalantılarını ilerledecek Britaniyaylan.
“Biz seftä bölä tehnikayı kablettik, o üüsek uura kaldıracek gençlerin bilgilerini hem elbetki saygı duyerız Britaniyaya”, — söledi rektor.
Ggaauziyanın Başkanı İrina Vlah şükür etti Büük Britaniyanın elçiliini baalantılar hem yardım için. Başkan belli etti umudunu ilerdeki sözlär hem annaşmalar için.
“Sevinerim, ani böla büük devletin elçisi aldı dikatına bizim avtonomiyamızı. Mutluyum, ani bizim gençlär da çalışêrlar üürenmää englez dilini, bu büük hodulluk. Herbir dil, eni dil bizä herkezimizä eni kolaylıkları açêr”, — nışannadı İrina Vlah.
Gagauziyanın Büük Britaniyanın elçiliinnän baalantılar ötää dooru da ilerleyeceklär.
Foto — preview: Gagauziya başkanın Facebook sayfası
Источник grt.md
