Bucak küüyünün gimnaziyasında düzdülär sanitar odasını
Bucak küüyünün gimnaziyasında sanitar odasını düzdülär. “Rotari club” finans yardımını bu işä verdi. Proektın koordinatoru “Noi aportuniti”cümnä kurumu oldu.
Bucak küüyünün gimnaziyasında gigiyena odasını 2020 yıldan başladılar düzmää. Uşaklara komfort koşullar yapıldı, ellerini yıkamak tertipleri koyuldular, sıcak suyu çektilär. 1989 yıldan beeri yapının içindä gigiyena odası yoktu, açıkladı okulun başı Tatyana Yabanjı.
“Lüdmila Karadagın yardımınnan biz “Rotari klub”- unnan tanıştık da 2021 yılda onnarlan başladık işlemää hem smeta dokumentlarını hazırlamaa, hepsi koşulları yaptık — suyu hem kanalızaţıyayı geçirdik. Primariya bu işleri yaptı hem harçların bir payını ödedi. Hepsini vakıdında yaptılar. Da bundan sora Rotari klubu işleri başladı geçirmää”, — açıkladı Tatyana Yabanjı.
Bu neetlerä erli bücettän 70 bin ley hem 36 bin ley kontribuţiya fondundan verildi. Bücetın bütün sayısı yakın 180 bin ley kurdu, 60 proţent onnardan Rotari klubundan verildi. İşleri kısa vakıtta başardılar, nışannadı “Noi aportuniti” cümnä kurumun başı Lüdmila Karadag.
“Proekt pek önemli, çünkü o ürenmäk kurumda gigiena koşullarınnan baalı. Biz var nicä çok IT tehnologiyalar için söleyelim, eniliklär için, ama üürenmäk kurumnarında ii sanitar koşulları yoksa, bu kötü iş. Yok fayda büük proektları yapmaa, baş sanitar odaları yokkana”, — nışannadı Lüdmila Karadag.
“Gigiena okullarda” proektı hep ölä Rotar klubun yardımınnan yapılȇr. Moldovada 1200 okuldan 300 — dä sanitar odaları yok, nışannadı klubun temsilcisi Aleksandru Robu.
“Bän düşünerim, ani uşaklar sevinmeliklän eni üürenmäk yılında okula geleceklär. Zerä bakın nicä ayırılȇr dışarda bulunan kenef hem ne biz düzdük, pak hem tertipli. Onun için bän düşünerim, ani diil sade Bucak küüyünä, ama bütün Gagauziyaya olacek örnek, çünkü çoyu okullarda sanitar odaları yok”, -söledi Aleksandru Robu.
Nışannayacez, ani Bucak gimnaziyasında taa 1989 yıldan beeri bütündän düzmäk işleri yapılmadı. Onun için lääzım bütün yapıyı tertiplemää, maasuz örtüyü hem yapının önünü, urguladı okulun başı Tatyana Yabanjı.
“Biz iki yıl geeri taa dokumentleri hazırladık, ama biz sponsor bulamȇrız. Örtüyü lääzım diiştirmää, ama onu brakacez. Sölämeyecäm, nekadar para örtü tutacek, ama yapının örtüsünün enilenmesi için smetası yakın üç million ley kurȇr. Bu büük paralar bizä deyni”, — açıkladı okulun başı.
Bucak küüyünün okulunda 98 uşak üürener. Bu yıl hükümet okullarda gigiyena odalarını yapmaa deyni 25 million ley verecek.
Источник grt.md 30.06.2022