“Rodika Roşiorunun talantları”: nicä halklararası vokal okulunda büüderlär genç artistları
Vokal zanaatı yıl-yıldan ilerleer, genişlener. Gençlär kullanȇrlar eni janraları. Onnardan biri — teatral janrası. Kulanmaa aktör becermeklerini çalarkana türküleri üürederlär Kişinöv kasabasının “Rodika Roşiorunun talantları” halklarası vokal performans okulunda. Burada ürener 43 uşak. Her yıl üürenicilär pay alȇrlar türlü halklarası konkurslarda. Bizim çekim grupamız bulundu genç vokalcılarınekzamenindä.
Kişinöv kasabasının “Rodika Roşiorunun talantları” halklarası vokal performans okulunda hepsi üürenicileri üürederlär ses kulturasına. Her birinä bulȇrlar repertuar onnarın becermeklerinä görä. Bundan kaarä uşakları savaşȇrlar terbietmää, ani onnarda peydalansın bölä karaktȇrın kaliteleri, nicä dostluk, söleer halklararası okulun başı Rodika Roşioru.
“Bän geçirerim ekzamenı her yıl. Teklif ederim bizim kultura adamnarını, angıları paylaşȇrlar kendi duygularınnan, annadȇrlar uşaklara, ne o sţena hem nicä etişmää üüsek uurlara”, — açıkladı Rodika Roşioru.
Uşakların becermeklerini notaladı juri azaları: anılmış çalgıcılar Konstantin Moskoviç, Natalya Proka, Liliya Şalomey, Oleg Baralük hem başkaları.
“Bän bu yıl juri azasıyım. Bu okulun terbiedenneri sık pay alȇrlar Slovänskiy Bazar konkursunda. Bu yıl iki kız gidevek bu yarışmaya”, — söledi Moldovanın anılmış nai çalgıcısı Konstantin Moskoviç.
Vokal okulun terbiedileni Adelina Dermenjı nışannȇȇr, ani taa küçüktän istärdi üürenmää çalmaa, da üüredici yardım etti aslıya çıksın onun istemesi.
“Bän bu okula gelerim 4 yıl. Benim en büük istemäm olmaa türkücü. Sayȇrım , ani bizim üüredici Rodika Roşioru pek kaliteli götürer kendi işini. Ona görä bizim uşaklar ilerleer”, — söledi kız.
Terbiedilennerin anaları-bobaları nışannȇȇrlar üüredicinin üüsek becermeklerini.
“Benim kızım genç talantların okulunda. O sever muzikayı . Rodika pek ii hem becerikli insan. Ona görä bizim uşaklar ilerleerlär”, — söledi üürenicilerin birisinin anası Natalya Keptene.
“Benim kızım sever muzikayı. Biz çok aaradık bu eri, neredä açılaceydı onun talantları. Bulduk bu okulu. Bän mutlu kaldım üürediciylän, hodullanȇrım onunnan, ani benim kızım üürener maasus burada”, — söledi taa bir ana İnna Gaydeu.
Haklarası okulun başarannarın aralarında var Moldovanın anılmış çalgıcıları.
Источник grt.md
