Proekt hazır, ama para yok. Tülüküüyün Kultura Evin zalı lääzım temeldän tertiplensin
Tülüküüyün Kultura Evin zalı bulunȇr kötü durumda. Oluşlar orda yapılmȇȇr şansora üç yıl. Onu temeldän eniletmää deyni lääzım buncak para, angıları primarıyada yok. Ama erli kuvetlär hazırladılar proektı da umutlanȇrlar, ani bu iş bitki – bitkiya gerçekleşecek.
“Kultura – o hepsini birleştirän bir dil” – ölä bir yazı asılı dürȇr Tülüküüyün Kultura Evin zalında. Bitki oluşlar orada yapıldıydı 3 yıl geeri. Zalın kötü durumun beterinä onu kapadılar, ki ap – ansızdan bir kimseyin kafasına yıkılmasın tavan.
Nemdän her taraf çatlak, duvarlar küflü, kimi erlerdä duvarların suvası düştü. Taftadan erlär hem sţena lääzım diiştirilsin, şafklar, isıtmak sisteması hem mobilya läzım eni koyulsun.
Kultura evin başı Larisa Buyuklı söleer, ani Gagauziyada bu bina arhitektura tarafından sade bir ölä, da bu paalılıı hem gözellii lääzım korumaa gelecek evlat boyları için.
«Kultura evimizä 54 yıl. O hep işläärdi, her zaman gözäl oluşlar yapılardı. İsteriz bizi işitsinnär dä yardım etsinnär bizä, ki biz ileri dooru da işleyabilelim dä kulturayı ilerledelim insannarın arasında», — söledi Larisa Buyuklı.
Bakmayarak Kultura evin halına, onun başka odalarında kurumnar işini ilerlederlär: yaradıcılık kollektivlär, muzey, biblioteka. Konţertlar ama geçerlär sade dışarda. Pandemiya dönemindä oluşlar geçärdi onlayn, haberledi oyun sekţiyasının başı Melaniya Koca.
«Sţenada yok nicä işlemää. Varsaydı nesoysa oluşlar, onnarı yok neredä geçirmää, zalımız pek kötü durmda. COVID-19 pandemiya vakıdında oluşları onlayn yapardık, yada küçük zalda. Ama pek isteriz, ki Kultura evimiz olsun sıcak hem kuytulu, da biz burada uşaklarlan işleyelim. Bölä taa islää olacek», — söledi o.
Kultura evin herbir işçisi pek isteer, ki binayı taa tez tertipilesinnär, dä artistlär hem siiredicilär genä buluşsunnar konţertlarda, söledi oyun sekţiyasının başı İvan Nänov.
«Bän dä pek isterim hepsi taa hızlı diişsin. Biz uşaklarlan bıktık işlemää dişarda, onnar üşeerlär. Lääzım sıcak bir erimiz olsun. Kaç yıl sıravardı düş güüderiz bunu için. Kultura evimiz sä yıkılȇr gözümüzün önündä», — söledi İvan Nänov.
Küü primariyasının uzmanı Grigoriy Kulak haberledi, ani zalın temeldän enilemäk işleri için hazır proekt 6 mln leya.
«Örtüyü diiştirmää, duvarları kaaviletmää, sţenayı düzmää, binanın dolayını tertiplemää edecek 6 mln leya yakın. Baş problemamız – zal. Başka odalar kullanılacak halda. Neetleneriz danışmaa Regional ilerletmäk agentstvosuna proektä para verilsin deyni. Neçinki kimär kerä lääzım büük zal oluşlar için», — annatı o.
Tülüküüyün Kultura evin zalı 800 kişilik. Bina düzülüydü 1967 yılda.
Источник grt.md
