Pravoslav hristiannarında Kolada orucu başladı
Pravoslav hristiannarında Kasım ayın 28-dän Kolada orucu çekeder hem sürtecek Büük (yanvar) ayın 6-dan. Bu oruç sayılȇr en önemli oruçların biri. Bu gündän beeri yakışmȇȇr katılmaa şennik olaylarına, evlenmää hem uşak vatiz etmää. Kurallara görä bu oruç hep ölä sert, nicä Petrov orucu.
Oruç tutarkana insan kendi imesinä hem ruhuna taa dikkatlı olȇr.
«Pravoslav hristiannar eveldän, ilk asirlerin çeketmesindän hepbir oruç tutȇrlar. Ozamandan taa bir vakıda atılȇrlar şenniktän hem yaalı imektän. Taa çok vakıt duva ederlär, kliseyä giderlär. Bölä insan hazırlanȇr ayozlu Kolada yortusuna», — açıkladı Komratta İoan Predteçe adına soborun klirii Dmitriy.
Kolda orucu diil pek sert, nışannȇȇrlar klise izmettçileri. Onun süresindä insannar var nicä kuraldan biraz çıksınnar.
«Bu oruçta ilkin akţent koyulȇr insanın can duygularına. İlkin lääzım duva etmää, kliseyä gitmää. İmäk kalȇr ikinci plana. Sade duva yardım eder yaalı imekleri imemää. Kolada orucu biraz taa ilin, nekdar Büük oruç. Dinnenmäk günnerdä yakışȇr balık imää», — annaştırdı soborun izmetçisi Dmitriy.
Kolada orucun kuralların pek sert olmamasına bakmadan bir-iki gün yortuya kaldıynan oruç sertleşer. Butakım, Kolada orucun bitki günü hem gecesi kimi inancılar bişey imeerlär taa ertesi sabaaya kadar günün duumasınadan. Çıkmaa herbir oruçtan lääzım dooru salıına zarar getirmedän.
Kasım ayın 28-dän ötää dooru insan oruç tutmaa başlȇȇr. Kolada oruçu her yıl bu gündä başlȇȇr, sürter 40 gün. Biter Koladaya karşı Büük (yanvari) ayın 6 — da.
Tekst: M.Statova, çevirdi: M.Topal,video: G. Stavilov, kurgu: A.Gerçu
Источник grt.md
