“Pobeda” kolhozunda hayvancılıı diil sade koruyabildilär, ama ilerlederlär dä
Kıpçak küüyün «Pobeda» kolhozunda hayvancılık ilerleer. Buna görä küüyün insannarında hem dolayında yaşayannarın var kolaylıı pak dikä olsun masalarında.
Hayvancılık Moldovanın üülen tarafında çiftçilerin arasında önemli payı alêr. Kıpçak küüyün «Pobedа» kolhozunda baacılık hem kır ţehlerindän kaarä var malların ţehı da, angısına girer inek, koyun hem domuz fermaları.
Domuz fermasında işleer 3 kişi. Kolhozda vaar 275 domuz. Kıpçak küüyün domuz fermasının başı Pötr Tabunsçik annadêr, ani iş diil kolaylardan, ama kendi işini adamnar bilerlar.
«İşimiz bizim belli, çoçuklar, artık var nica sölemää, pensiyää çikaceklar bir-iki yıldan sora. İşlerini bilerlar, sabaalen kalkêrlar 5-tä çekeder işleri paklamaktan, incä demää kırnaklamaa doyurȇrlar», — annattı Pötr Tabunsçik.
O nışannadı, ani büüdülmüş domuzlar satılacek insana. Ondan kaarä, birazı kesileçek, neçinki başladı ilkyaz kır işleri. Onuştan lääzım doyurmaa insannarı da, kim «Pobeda» kolhozunda çalışêr.
«Büünkü günda var 189 motkurçuk, onnarı savaşêrız büütmää, korumaa. Birazı satılaçek insana, ne dä kalaçek savaşaçez büütmää ötää dooru. Şindi ilkyaz ekmesini çekedeçiklär, papşoy, semeçka. Mehanizatorları lääzım doyurulsun, orayı keseriz. Bereketleri toplayarkana genä, insannarı doyuryȇrız kolhozda», — açıkladı domuz fermasının başı.
Nicä nışannadı domuz fermasının çalışanı İvan Rusev, o 16-yıl çalışêr domuz fermasında, her bir yıl «Pobeda» kolhozu savaşêr, ani insanda olsun taazä pak dikä. Şindiki vakıtta, bu pek önemli.
«Bän bu domuz fermasında işlerim 16-yıl. Savaşêrız büütmää bu motkurçukları insana deyni. İnsanda hepsi paalı oldu, hepsi insan baksın birär motkurçuk, slâninaları olsun, isinnär. Te bu te önemli, hem dooruluk olsun islää, insan kazansın da para olsun. Domuz alsınnar, paalı biraz, ama yok ne yapmaa», — söledi domuz fermasında çalışan İvan Rusev.
«Pobeda» kolhozunda taa var koyun ferması da. Ama yıl-yıldan koyunnarı bakmaa taa zor olêr, neçin deyni çayırlar azaldı, yok neredä otlatmaa onnarı. Bu işlär için kolhozda var kendi doyurmak temellii.
Источник grt.md
