Paskelleyä karşı imek malların kalitesi uzmannarın göz altında
Paskellä yortularına karşı sıklaştılar reydlar imek malların kalitesini kontrol edän Agentstvosunun uzmannarın tarafından. Onnar gözlederlär malların kalitesini, angıların kullanması var nicä zarar getirsin insannarın saalıına. Her bir imek malında lääzım olsun ȇtiketka, angısında olmalı informaţiya nedän yapılı hem da nekadar vakıdın içindä var nasıl onu kullanmaa.
Paskellä yortularına karşı Komrat kasabasının panayırın sergileri dolu türlü mallarlan. İnsannar alatlȇȇrlar yortuyadan satın almaa ne lääzım. İmelik kalitesindä kontrol etmäk Agentstvosunun baş inspektoru Alla Kalçeva verdi birkaç nasaat satın alannara.
«Hepsi insannar lääzım satın alsınnar imek malları tükennerdän. Te burada trotuarda onnar diil lääzım satsınnar imelik. Satın alarkana imelik, insan var nasıl istesin malın kalitesi için sertifikatı. Yok nasıl kontrol etmää o imelik mallarını, angıları satılȇrlar yasaklanan erlerdä hem sokakta», — dedi inspektor.
Satın alannar lääzım esaba alsınnar imek mallarını korumak koşullarını. Avtonomiyanın yaşayannarı söleerlär, ani onnar her zaman bakȇrlar malların koşullarına hem da paalarına.
«Bakȇrım olsunnar kaliteli imek maları paaya görä. Deecez, giderım satın almaa bir parça yanı, bakȇrım benizinä hem da paasına, da sade ondan sora satın alȇrım».
«Panayırdan bän pek siirek satın alȇrım, ta zedä tükendan. Kimärsaydı babulardan rasada satın alȇrım, yada başka bişey».
«Bakȇrız, nekadar dayanacek mal, bän bilerim».
«Biz taa zeedä insandan satın alȇrız, fukarä insannardan — işmik, kaymak. Bän bilerim, ani onnarda her zaman pak”.
«Bakȇrım malın benizinä, da bendä var bir tabeet kokmaa, kimärsaydı insan verer datmaa».
«Bakȇrım paaya, neçinki hepsi paalı, patlıcannar da taa ileri edärdilär 50, ta zedä da, 60 leydan. 2000 ley pensiyadan nekadar satın alacan?»
«Elbetki, kaliteya da, paya da bakȇrız, satın alȇrız imeelik uşaklar için, hastalar için, bizä lääzım kaliteli mal».
«Kaliteya bakȇrım hem malın taazeleniinä. Deecez, yanı lääzım olsun taazä, balıı bakȇrım kulakların benizindän».
Uzmannar nasaat ederlär insannara atent olmaa yımırta boyasınnan Paskellä için, neçinki bu mallarda var himiya, da var nasıl kötü belli etsinnär saalıkta. Satın almaa boyaları lääzım maasuz brakılmış satmak için erlerdän.En islää boyamaa natural mallarınnan.
Источник grt.md
