Onnarca insan verdilär Komratta kanını Dünnä donor günündä
Moldovada kirez ayın 14-dä Dünnä donor günü bakılȇr. İsteyennär bu gün var nicä kendi kanını başkalarının yaşamasını kurtarmak için versinnär.
Komrat kasabasında işleyän kan vermesi merkezin kapuların yanında taa çin sabaaylendän insan toplandı, herbiri geldi kendi kanınnan paylaşmaa.
“Biz büün saat 7-dän beeri işleeriz. Biz bu akţiyayı geçireriz diil ondan, ani bizä yok neylän hastalara yardımcı olmaa, ama isteeriz sıradan insan bizä gelip, kan versin. Biz isteeriz, ki taa çok gençlär bu iştä pay alsınnar. Sevindirer, ani gençlär bu işi annȇȇrlar, da bizä yıl-yıldan gelerlär”, — açıkladı kan vermesi bölümün öndercisi Semön Dragnev.
Kan vermäk merkezinä gelennerin taa çoyu yıllar boyunca şansora kan vererlär. Onnarın arasında bulunȇrlar GRT cümne kompaniyasının uzmannarı da.
“Bän büün yardım ederim bir insana, angısı zoor durumda bolniţada bulunarmış. Bän hiç onun adını da bilmeerim, bana telefon açtılar da teklif ettilär geleyim, bän osaat kayıl oldum çünkü annȇȇrım, ani benim kanım var nicä kiminsä yaşamasını kurtarsın. Benim kanım pek siirek karşı geler, üçüncü negativ grupa. Bana doktor bunu söledi, dä yalvardı, ani bän her üç ay geleyim kan vermää. Bän savaşacam bu işi yapmaa”, — paylaştı GRT –nın uzmanı İuliyä Rosti.
Bir yılda yakışȇr karılar 4sıra kan versinnär, 5 sıra da adamnar. Kan vermesindän sora saalıklı insanda kan tez enilener.
“Bän kendimi pek islää duyȇrım. Verdim ikinci sıra kan. Pek isteerim, ani benim kanım kimäsä yardım etsin”.
“Bän her zaman kan vererim, hem isteerim bu ii başkaları da yapsınnar. İnanȇrım, ani benim kanım kimisä kurtaracek”.
“Bän üç ayda bir sıra kan vererim. Teklif ederim hepsini kan vermää, bizim kanımız var nicä kimäsä yardımcı olsun”.
Kan vermesi akţiyasında pay aldılar polis uzmannarı hem karabinerlär dä.
“Bän 6-cı sıra vererim kan. Bizim uzmannarımız şansora sınaştılar bu akţiyaya. Biz pek islää bu işä bakȇrız. Eer benim kanım bir kimseyä yardımcı olarsaydı, bän pek sevinecäm”.
Herbir insan lääzım annasın, ani kan vermää lääzım diil sade dünnä donorları günündä. Kan yada ondan alınan komponentlär lääzım olȇrlar herzaman. Onnar diil sade ilaçlasınnar hastaları, ama yardım ederlär kan verän insannara da kendisini taa ii duymaa.
Источник grt.md
