Nicä vermää danışmayı suuk vakıdı para yardımı için: ne bunu için lääzım hem nereye danışmaa
Gagauziya yaşayannarın danışmakları suuk vakıdında para yardımının kabledilmesi için zeedelener. Ayın parası 700 ley kurȇr. Soţial asistentlerinä 13 bin ayledän taa çok insan danıştı. Saalık hem soţial koruması Bakannıında belli ettilär, ani yardımı kabledennär — aylelär, angılarında yaşȇȇr makar bir kişi, angısı uyȇr kanonnan bakılı sekiz kategoriyaya. Ne uurda büün gider insannarın danışmaklarını kabletmäk işi, üürendi Mariya Statova.
Soţial asistentlerin izmetindä vatandaşları çin sabaalendän kablederlär. Yaşayannarın taa çoyu – pensionerlar. Yardım parasını — 700 leyi kabletmäk için region büdjetindän lääzım aylenin kişi sayısı için kiyadı getirmää. Komratta primariyanın haberlemäk merkezindä vererlär. Kabledenin yanında lääzım olsun aylä kişilerin kimniklerin kopiyaları.
«Hemprimariya, hem soţial asistent bilerlär kim angı ayledä yaşȇȇr. Var nicä kimi diişelmeklär olsun. İnsannar yaşadılar bir ayledä, sora ayırıldılar, geçtilär yaşamaa ayırı evlerdä, da tä oldu iki aylä. Bölä örneklär az var, ama önemli ki insannar dooruyu sölesinnär hem belli etsinnär, neçin ani bu bilgilär kontrol edilecek. Devlet yada Gagauziya uurunda verilän herbir para yardımı kontrol ediler”, — nışannadı Gagauziya saalık hem soţial koruması bakanı Svetlana Duleva.
Var yaşayannar, kim aylä kişileri için kiyadını kabledärkana, kimi zorluklarlan karşılaştılar. Ölä bir örnää GRT -nın «Dialog v studii» radio programasında annattı cannı yayında yaşayannarın birisi. O aalaştı, ani spravkayı alamayacek primariyaya vergileri ödämeyincä. «Prämaya liniya» programasının musaafirleri deputatlar Aleksandr Dülger hem Viktor Petrov bu olayı primariya tarafından yannış buldular.
«Avtonomiyanın hepsi yaşayannara danışȇrım: er her kimsey bölä duruma düşärseydi, ani sizdän üstelik bir dokumenti istärseydilär, danışın bana. Biz haklarınız tarafından sizä yardım edecez hem durumu çözmää savaşacez. Bu diil dooru açan insandan isterlär bişey, neyi o diil lääzım versin», — söledi Viktor Petrov.
Yaşayanın elindä varkana kimnik, pensiya dokumendi hem aylä spravkası, insan lääzım soţial asistentinä yaklaşsın da maasuz bildirimi doldursun. Yanvardän mart ayına kadar o 700-är ley her ay kabledecek.
Avtonomiyanın tarafından yardım parası kış zamanında biraz harçları kolayladacek, söleer insannar.
«Makar ki bir ayın şafkını ödemää olsun bu paraylan. Saa olsunnar varsaydı kolaylık yardım etmää pensionerlara. Neçin olmasın?»
«Elbetki kolayladacek. Bakın ne paalar gaza hem şafka! Makar odun alacam bu paraylan».
«Makar bukadar. Neçin ani 2500 leylik pensiyaya yaşamaa pek zor».
«Pensionerlara herbir kopeyka kıymetli».
Saalık hem soţial koruması bakannıın bilgilerinä görä, regionda 13 bin ayledän zeedä danıştı suuk vakıdı para yardımı için. Er insannarın hepsi 8 kategoriyası da kaplanabilirsä, yaşayannarın 50-60% kabledeceklär yardım parasını.
Belli ederiz, ani 2023-cü yılda bu uura regionun kuvetleri büdjettä 30 mln ley ayırdılar.
Avtor: M. Statova, S. Dimitroglo, video: V. Tabaçuk, montaj: A. Gerçu
Источник grt.md
