Nicä karıların hem adamnarın haklarını seçim proţesindä birtürlü yapmaa, açıkladılar seminarda Komratta
Devletin Merkez seçim komisiyasının üüretim merkezi iki günün süresindä Komratta geçirdi seminarı «Seçim proţesindä gender aspekti» temaya görä. Oluşun baş neeti göstermää, ani seçimnerdä nicä karılar, ölä dä adamnar birtürlü sayıda kandidat olsunnar. Seminarın süresindä politika partiyaları temsilcilerin,erli cümnä administraţıya azaları, mass-mediya uzmannarı hem vatandaşlar bu temaya kendi bakışlarını açıkladılar.
Gender aspektleri lääzım seçim proţesindä dooru konuda gösterilsin bakmayarak stereotiplara. Devletin Seçim kodeksindä belli politika partiyalardan adamnarın hem karıların sayısı, nışannadı istoriya doktoru, doţent, Devletin Merkez seçim komisiyasının üüretim merkezin azası Arina Kraycdan.
«Açan belli ediler Moldova Devletin Parlamentinä seçimnerin kandidatları hem onnarın listeleri, mutlaka onnarın arasından 40 % ya karı yada adam olsun. Bölä olacȇk kolaylık hepsi pay alsın seçimnerdä», — nışannadı Arina Kraycdan.
Kanona görä vatandaşların herbir kategoriyasına seçim proţesindä birtürlü hakları vermää lääzım. Hem karılar hem da adamnar bir uurda lääzım öndercilik etsinnär. Kabledilmiş kanonnar verer kolaylık bir uurda karılara hem adamnara bakmayarak yaşlara pay almaa kararların kabledilmesindä.
«Moldovada ii örneklär var. Onnarın hatırınnan bizim parlamenttä karı da var. Var kolayımız gençleri dä Parlamentä katmaa. Erli uurda gender aspektindä türlü stereotiplär var, onuştan da engel ederlär gençlerä», — söledi seminarın trenerı Mihail Rotar.
Seminarın pay alannarı tanıştılar gender aspektlerinnän seçim proţesindä.
«Sayȇrım, ki bölä seminarlar lääzım yapılsınnar. İnsanda az bilgi bu uurda var. Bilsinnär kendi haklarını hem karılar, hem adamnar. Az bilmää, ama lääzım bilmää onnarı kullanmaa da», — nışannadı daavacı Timur Kovalöv.
Seminarın süresindä katılannarlan praktika zanaatları da geçirlendi.
Seminar birleşik halkların kurumun yardımınnan hem Şveţıyanın para yardımınnan geçiriler.
Источник grt.md
