Nicä hayvancılık bölümü ilerleer Gagauziyada
Bu yıl hava koşulları zorlattılar diil sade te onnarın işini, kim büüder boday, semiçka, papşoy, ama te onnarın da kim tutȇr hayvan. Hazırlmaa alaf ineklerä hem koyunnara oldu zorca, neçinki papşoy bereketi pek yufka, da sıra gelecek almaa em başka kurumnardan. Neylän büün yaşȇȇr hayvancılık bölümü, üürendi bizim korrespondentımız.
Komradın bir hayvan fermasında bütündän başladılar hazırlamaa kışa alafları, silosu. Bu yıl papşoy bereketi pek küçük. İi yıllarda bir ektardan toplardılar 30-35 ton , bu yıl 2-3 ton,- söleer kurumun başı İlya Koynak. Sıra gelecek alaf satın da almaa, zerä etişmeyecek gelän yıla.
İLYA KOYNAK hayvan fermasının başı : — » Etişmeer bizä bu yıl alaf, pek zor yıl. Bilmeerim, nicä çıkacıız bu durumdan, savaşacıız geçirmää onu. Ver Allaa, gelän yıla bereket olacek taa ii».
Bu yılın kuraklıı getirdi ona, ani papşoy büümedi, onnar biçerlär onu silosa. Bu kurumda koymadılar beslemäk materiallarını hem sulamadılar. Savaşȇrlar kırlarda organikayı kullanmaa, çünkü beslemäk malları pek paalı. Aldılar eni tehnikayı da, ki taa ilin olsun biçmää silosu.
İLYA KOYNAK hayvan fermasının başı : — » Papşoy pek yok, sulamadık bu yıl. Aldık kombayın zerä, onsuz yoktu nicä. Her sıra gelärdi beklemää, kim başaracek, da sora almaa biçmää. Da geçärdi vegetaţiya fazası, da kaybedersin alafları da. Sıra geldi almaa büük kredit almaa kombaynayı deyni».
Bakmadan bu yılın hepsi zorluklarına kurumda zeedelettilär ineklerin sayısını, aldılar 170 hayvan eni Djersi porodada, angısı ekonomika tarafından taa ii, nekadar öbürlär Golştina Frizȇ,- söleer İlya Koynak.
İLYA KOYNAK hayvan fermasının başı: — » Şindi geçeriz bu çeşitä, zerä onnara taa az harcanȇr em, bakarak golştina frizȇ ineklerinä, angıları 800-900 kilalık, djersilär 400- 500 kila çekerlär. Taa az em hazırlamaa lääzım olacek».
Bitki yıllar devlet verer subsidiyaları fermelera . Bir inek için geeri çevirerlär 50% onun paayından. Taa yardım ederlär düzmää fermaları hem eni tehnikayı almaa. Ama bir yılda kurum var nicä harcasın hepsi bu işlerä sade 7 million ley. Fermerların bu uura var kendi bakışları.
İLYA KOYNAK hayvan fermasının başı: — «Biz aldık eni hayvan, onun için alamȇrız eni tehnika, zerä koyulmuş paranın sayısına etiştik. Da bizä sıra gelecek beklemää gelän yılı. Şindi alȇrız avadannıkları saamak zalasına Poloniyadan diil az para , da bilmerim ne yapmaa, beklemää gelän yılı mı, da vermää subsidiyalara , osa başka bişey düşünmää. Bakacez».
Bakmadaan hepsi zorluklara fermada neetlenmeerlär durgunmaa bu sayıda, da isteerlär zeedeletmää hayvannarın sayısını hem südün da, ki yakışsın ileri dooru koymaa tedarlıkları da, yapmaa piinir hem başka maasul mallarını. İlya Koynak söleer , erlim bütün candan sevärsän bu işi, ozaman o gidecek ileri. Hayvannar da bunu duyȇrlar.
Источник grt.md
