Moldovada korupţiyaylan güreşmäk komissiyasının azalarını seçtilär
Moldova Parlamenti kurdu korupţiyaylan güreşmäk komissiyasını, angısı kontrol edecek devlet görevlerinä, dava hem prokuroratura uurlarına kandidatların varlıını.
Korupţiyaylan güreşmäk komissiyasına girerlär 3 kandidat Moldovadan: Kişinöv apelläţiya palatasının daavacısı Tatyäna Radukanu, Yüstiţiyä hem insannarın haklarını korumak programasının temelcisi Nadejda Hriptievskaya hem daava uurunda ekspert Vitaliy Miron. Komissiyanın taa 3 azası da temsil ederlär Evropa Birliini: Viktoriya Henley, Nona Ţonţoriya hem Fan Hebel.
Moldovadan teklif edilän kandidaturalar için soruş peydalanmadı, Evropa tarafından kandidaturalar sa meraklandırdılar Parlament deputatını Vladimir Voronini.
«Evropadan alınan kandidatlar kabledeceklär ay paralarını. Bizdä Molovada bölä insannarı bulmaa yoktu mu nicä?» — sordu Voronin.
«Onnar kanona görä kabledeceklär ay parasını donarların tarafından», — cevapladı ona üstiţiya ministrusu.
«Bu insannar burada kontraktlan işleyeceklär, nicä bän anadım?” – sordu deputat – kommunist Oleg Reydman. “Dooru” – cevapladı Olesyä Stamate. “Butakım biz bitki – bitkiyä Moldovada da kablettik gastarbayterları”, — ilerletti fikirini Reydman.
«Bu işlär yazılı kanonda. Daava hem prokuratura uurlarına kandidatlarını korupţiyaya tarafından kontrol etmäk komissiyasının azaları Evropa Birliin Veneţian komissiyasınınnan teklif edildilär. Komissiyanın kendi sekretariatı olacek», — açıkladı Stamate.
«Bu pek önemli bir komissiya, hem biz lääzım seçelim bu görevä satılmayan insannarı», — nışannadı parlamentın başı İgor Grosu.
Daava hem prokuroratura uurlarına kandidatlarını korupţiyaya tarafından kontrol etmäk komissiyasına girerlär millet hem halklararası ekspertlär dä.
Источник grt.md
