Moldovada avtobus biletları genä paalılandılar
Kasaba hem küü aralarında gezän avtobuslara biletlar genä paalılandılar. Paa zeedelendi 9 banä bir kilometra için. Devlet hatalı olaylar komissiyası kararladı, ani paalar koyulaceklar petrol malların paasının üüselmesinä görä bitki edi günün içindä. Karar işleyecek hatalı durumun süresindä.
Durum paaların üüselmesinnän kasaba hem küü aralarında marşrutlara diişilecek her afta. Tariflär üüselerlär bakarak petrol malların paasınına. Hesaplamalar hepsinä bir türlü – eski paaya eklenecek 9 ban her bir kilometra için. Örnek gibi, Kongazdan gelärdilär insannar 15 leyä, büün sä paa kaltı 20 leya yakın. Valkaneştän Kişinöva paa kurȇr 130 ley, Komrada 65.
VLADİMİR ÇEBAN, Komrat avtogaranın başı: “Kongaz, Kirsovo hem başka küülerin insannarı söleerlär, ani paalı, da arayaceklar başka transport. Nicä biz görerız, tarif büüdü 9 banä bir kilometra için. O kurardı 80 ban birinci kategorıyada, ikincidä — 90, şindi hep bu tarıf kurȇr 89 ban hem 99 ban”.
Avtobusların şoförları söleerlär, ani bu bir vakıtlık karar işä yaramayacek da onnarın harcamaklarını azaltmayacek. Ölä da insan azdı, şindi hiç da olmayacek, urgulȇrlar onnar. Nicä yaşamaa büünkü durumda, bilmeerlär. Diil çoktan petrol malları paalılandı iki leyä, ne var nicä getirsin avtobusların durgunmasına, çünkü para etmeer almaa petrol mallarını.
“Te bakın, üç kişi aldım, 60 ley, yok ne yapmaa. Nicä işlemää? Bän verdim intervyu, ani insannardan 15 ley alacez, zerä annȇȇrız, ani onnarda yok para, yaşayannar bizi annȇȇrlar, çalışardık gelsinnär bizimnän, büün te paa başka. 19.58 bilet tutȇr”.
”Hepsinä bu vakıt zor, insannara da, bizä dä. Ölä dä insan yok. Bunnar da olamayacek. Yok insanda para, hepsi bunu biler”.
“Solärka paalılandı, başka işlerä da paalar kalktı, ne yapmaa? Ne olacek ileri dooru, bilmeerim. Onnar ko kaldırmasınnar paaları petrol mallarına. Da o zaman olaceydı ii da kaldırmayaceydılar paaları”.
Çoyu yolculara biledin paası oldu kötü sürpriz, çünkü dün onnar ödärdilär taa az. Kim avtobuslan gider siirek, pek duymadı paa kalmasını, ama kim her gün, söleerlär, ani pek urȇr cöbünä. Maalez studentlar, angıları her gün gelerlär üürenmää, stipendiya da etişmeer yola.
“Bän Vaklaneşa giderim, bilmäärdım, nekadar tutȇr paa, ama ödedim 65 ley”.
“Ödedim 130 ley. Ama taa ileri kendi maşınamlan gidärdim, ama benzin paalılandı, da geçtim avtobusa. Urȇr cöbüna, benzinın paalılanması urȇr hem pek. Biledin paası ii. Sade iisiltsinnär petrol malın paasını, etecek”.
“Esaba bunu almȇȇrım, erlem bana lääzımsa, bän gıderim. İnsannar, angıları alȇrlar bunu esaba, gitmesinnar”.
“Bu pek zor! Da bän sanȇrım, anı insannar taa siirek cıkaceklar yola”.
“Biletlär ileri tutardılar 19 ley, şindi 25 — bu palı. Sizin bücetınıza deyni taa yakışıklı, ama paalı. Üürenerim ama kalmȇrım obşejıtiayda, da her gün sıra geler gitmaa — gelmää. 50 ley — paalı”.
“İnsana zor. Gitmeyecän sık avtobusta. Pek zor”.
Avtogaranın başı nışannadı, ani paayın üüselmesinnän azaldı insannarın sayısı da, ama taa çok şüpelendirer, ani paaları taa diiştireceklär, angı tarafa baalı petrol malların paasından.
Источник grt.md 15.03.2022