Moldovada arabayı kullanmak kimliini kabletmää olacek taa kolay. Ne diişti?
Moldova devletin hükümeti kayıl oldu devlet izmetleri Agentstvosunun proektinnän, angısınä görä şoförluk zanaatına ȇkzamennerin kurlları diişileceklär.
Çiçek ayın 1 – dän Moldova devletindä B kategoriyada şoför zanaatını kabletmää deyni lääzım olmayacek poligonda praktika ekzamenini vermää, nışannadı Evropa avtoşkolaları Asoţiyaţiyasının temsil edeni, Komratta “Şoförlar birlii” filialın öndercisi Sergey Konstantinov.
“Bän sayȇrım, ani bu pek islää. Bu baalı onunnan, ani pek çok kursant üürenerlär bu kategoriyada. MRȆO (dolaylar arası registraţiya hem ȇkzamen bölümü) kurumun ȇkzamen bölümü da etiştirämeer hepsindän ȇkzameni kabletmää. Burada isteerim çizgilemää, ani ȇkzamen verilecek diil poligonda, ama kasabanın içindä”, — söledi o.
Filialın instruktoru Valeriy Şuparskiy nışannadı, ani bu diişilmeklär ii kursantlar için.
“Bän nicä instruktor sayȇrım, ani bu pek islä iş, ani olmayacek poligon, da taa az sıra olacek MRȆO — da . Bu pek islä kursantlar için o üzerä, ani kabledän bilgileri kullanabileceklär onnarı hep o vakıt praktikada”, — nışannadı Valeriy Şuparskiy.
Avtoşkolanın kursantları bölä diişilmeklerä sevinerlär.
“Pek islä olacek. İnsan durmayacek çok vakıt sıralarda, ȇkzameni vermää deyni– bu ilk, ikinci da o, ani ta kolay soruşlar çözüleceklär”.
“Bän sayȇrım, ani bu dooru bir iş, ani ȇkzameni vermeyeceklär poligonda, ama kasabada. Üürenmäk proţesindä sa poligon lääzım. Kursantlar kendi bilgilerini kullanaceklar praktikada”.
Bundan karä, azalacek dokumentlerin sayısı, angılarını kursantlar lääzım versinnär ȇkzamen için. Lääzım olacek göstermää sade kimliimni.
Komratta “Şoförlar birlii” filialında üürener 60 kursant. Te o kişilär, angıları isteerlär kabletmää şoför dokumentini AM, A1, A2, A hem B1 kategoriyalarında, onnar için polygon ȇkzameni kalȇr kuvettä.
Источник grt.md 29.03.2022