Moldovada açıldı şarap turizması marşrutlar. Biri onnardan üülen tarafında geçer
Moldovada kurdular dört şarap turizması marşrutlarını. Ona girdilär Moldovanın 10 şarap kurumu.
Şarap turizması marşrutlarına girdi dört turistlik yolu: Ştefan Vode, Valuluy Traiyan, Kodru hem Moldovanın poyraz dolayı. Proektin neeti — birleştirmää kultura zenginniklerini şarap uurunda.
Proektin menecerları tanıştırdılar musaafirleri regionnan hem annattılar meraklı erlär için. Musaafirlär dä paylaştılar kendi bilgilerinnän bu uurda.
“Bän sevinerim açıklamaa bu proektı, angısı baalı şarap turizmasınnan Moldovada hem Rumınıyada. O pek önemli bizim regiona deyni, çünkü bizim regionda şarapçılık ilerleer, da hepsi turistik obyektları, angıları bizdä var, kabledeceklär üüsek gelirleri bu proekttan. Çünkü biz açacez eni marşrutları hem te onnarı, angıları var bizim regionda hem Moldovada”, — açıkladı Vitaliy Burlaka, “Stabilnosti” kurumun başı.
Başka devletlerdän turistlär var nicä gelsinnär regionun şarap kurumnarına, angıları girdilär turistik marşrutuna. Ona var nicä eklensinnär genç şarapçılarda.
“Bu pek meraklı, da bölä bölüm nicä şarapçılık, pek meraklı turistlerä deyni. Şarap bizä deyni kulturanın bir payı, da meraklandırȇr her keret insannarı. Bu unikal kolaylık teklif etmää turistleri, annatmaa bizim dolay için, nicä yaşardılar bizim dedelär, halk adetlerimiz, imeklerimiz için”, — söler şarapçı Aleksandr Sırbu.
Rumıniyadan uzmannar nışannadılar, ani marşrutların açılması zeedeledecek turistlerin sayısını hem kaavileştirecek davletin ekonomikasını.
“Sizdä şarapçılık üüsek uurda. Var neya biz üürenelim. Onun için türlü gezintilär vererlär eni haberleri. Bu pek önemli turizmanın ilerlemesinä. Turistlär göreceklär nesä meraklı hem eni”, — söledi proektın koordinatoru Ruminiyadan Radu Oprä.
“Bän pek sevinerim, ani işledik komandaylan Gagauziyadan, Rumıniyadan. Ȇkspertlär yaptılar kendi işini, savaştılar yapmaa saytı, angısına girip var nicä üürenmää lääzımnı haberleri marşutlar için. Turistlär taa çok gelerlär dinnenmäk günnerindä, da onnara lääzım hazırlamaa nicä meraklı, ölä da faydalı ekskursiyaları”,- söledi proektin menecerı Ruminiyadan Oana Daşbog.
Oluşta pay aldılar studentlar da KDU hem Komrat kolecindän. Onnar urguladılar bölä buluşmakların faydalıını hem çizgiledilär, ani kabledilmış haberlär yardım edeklär üürenmektä.
“ Bän sanȇrım, ani bütün prezentaţiya pek faydalı bizim regiona deyni, bizim turizm bölümün ilerlemesinä, neçinki onu lääzım ilerletmää, annatmaa onun için”.
“Bän düşünerim, ani onnar pek faydalı, neçinki bölä oluşlarda biz alȇrız becermek, angısı bizä lääzım olacek ileri dooru zanaat uurunda üürenärkänä”.
KDU ekonomika kafedrasının başı Svetlana Kuraksina nışannadı, ani bölä buluşmaklarda studentlar üürenerlär çok meraklı işleri, da var nicä alsınnar ideyä açmaa deyni kendi kurumnarını.
“Bölä oluşlar lääzımnı, neçinki studentlär üürenerlär turizm uurunda da var kolaylıkları görmää o erleri, angıları var bizdä, neylän zengin bizim Moldova, ki diil sade görmää, ama üürenmää dooru götürmää biznesı”,- nışannadı KDU ȇkonomika kafedrasının başı Svetlana Kuraksina.
Üç günün içindä proektin pay alannarı bulunaceklar Moldovanın meraklı erlerindä, hem şarap kurumnarında. Ȇkskursiyaylan onnar şansora bulundular Komrat şarap kurumunda, angısı girdi turist marşrutuna.
Proekt finaslanȇr Evropa Birliinän Günduusu programmasına görä, hem giriştirildi Komrat “Stabilnosti” merkezinnän.
Источник grt.md
