Moldova Rusiyaylan gaz oyuncaa oynêêr, insannar sa tezää geçerlär
Kışa karşı Moldova hem Rusiya arasında gaz dartışmalrı var nicä getirsin ona, ani bu yıl bütünnä Moldova tezää geçecek. Politika beterinä Moldova kuvetleri kış başında başladılar Rusiyaylan gaz oyuncaa oynamaa. Da bu oyunnan insannarı yısınmak için odunnan kömür almaya hem tezek aaraamaya soktular.
Ani Moldovanın kimi küülerindä XXI-ci asirdä dä tezeklän yakmaktan vazgeçmedilär biz bilärdik, ama, ani bütün Moldova tezek aaramaa başlayacek – bunu biricii beklemäzdi. Tezää sa kimsey samtêêr. Bu arada odunnan kömür paaları da yukarı fırladılar. Bu durumda Moldova kuvetleri Rusiyaylan gaz oyuncaa oynamaktan hep vazgeçmeerlär.
Gaz kıtlıı sa aaçlık kıtlıına dönmää başladı. Ekmek hem başka iyecek malların paaları patladılar. Elektrika, gaz, benzin hem solärka paalaarı durmamayca büüyerlär.
Gaz kıtlıı beterinä AB “Moldovagaz” kompaniyası gaz ekonomiyasına çaarêr.
Gaz kıtlıı beterinä büük fabrikalar hem yısıdıcı țentralları mazut yakıtına geçtilär.
Devlet kuvetleri, Üstolan durumunu uydurup, devlet yakıt rezervalarını açtırdılar da oralarını boşaldêrlar.
Bücet rezervasından da 15 miliard ley para alıp, onnar, kendi gazı olmayan Polşa aracı firmasından, bir bakırcık gaz satın aldılar – 1 milon kub! Moldova sa gündä 15 -20 milion kub arası gaz kullanêr. O gazın da paasını saklı tutêrlar. Sansın parayı kendi ceplerindän ödärmişlär gibi.
Şindi taa nesoysa aracı firmasından taa birbuçuk bakırcık gaz bulmuşlar – 1,5 milon kub. Hep ölä saklı paaya.
Bu bakırcıkların hem saklı paaların ardında sanki ne var? Açaba tunuk suda balık tutması mı osa başka iş mi?
Nicä dä olsa, kimin sa harșaklıı beterinä, Moldovada gaz işi gölü kaşıklan doldurma işinä döndü.
Todur ZANET
Источник anasozu.com
