Moldova hem Rumıniya sınır dolaylarında şarapçılık turizmasının ilerlenmesi kolaylıkları bakıldı Komratta
Komratta geçti biznes — forum şarapçılık turizmanın ilerlemesi için, angısı kaplȇr Moldoavanın hem Rumıniayanın sınır boyunda dolaylarını. Onun neeti — vermää kolaylıkları şarap hem HoReCa kurumnarına pay almaa becermeklärlän, kabletmää bilgileri proektlär için, angıları baalı şarapçılık bölümünnän.
Çoyu devletlerin ekonomikası 70 proţenda baalı turizm bölümünnän, onun için Moldovada var kolaylıklar ilerletmää şarapçılık turizmasını, sayȇr aaraştırmaların avtoru Svetlana Genova. Gagauziyada, onun laflarına görä, var kurumnar, angıları var nicä versinnär hepsi koşulları, ani baalı turizmaylan. Bu bölümün ilerlemesi ii belli olacek diil sade devletin ekonomikasında, ama avtonomiyanın da. Açılacek eni iş erleri, gelecek investiţıyalar hem taa kaliteli olacek verilän koşullar.
“Şarapçılık bölümündä çalışer 20 proţent insan Moldovada, ileri dooru kurumnar birleşärsaydılar klasterlara, ozaman zeedelenecek insannarın sayısı, angıları çalışaceklar bu sferalarda, ekonomika efektı olacek eni turistik erlerin açılması. Bu getirecek eni finans gelirlerini ekonokikamıza, ilerleyeceklär şarap kurumnarı da”,- açıkladı Svetlana Genova.
Moldovada yapıldı dört şarap marşrutu, angılarına girdi Gagauziyanın da kurumnarı. Sırbu kardaşları hazır katılmaa bu marşruta, da şaştırma turistleri unikal şarpalarlan, halk imeklerinnän.
“Küçük kurumnarın ilerlemesi- bu pek önemli şarap sektoruna deyni, zerä bu bölüm olȇr taa meraklı, ki diil sade büük kurumnar yapȇrlar şarapları, angılarını satȇrlar HoReCaya, ama açan yapȇrlar kuçük kurumnar türlü şarapları, ozaman onnar meraklandırȇrlar turistleri”, — söledi şarapçı Alik Sırbu.
Gagauziyanın şarap kurumnarın kimileri şindän sora kablederlär turistleri, onnara var neylän musaafirleri şaştırmaa. Bizim region teklif eder turistleri türlü sferalara, da nekadar taa çok kurum katılacek bu işlerä, okadar taa çok iş erleri açılacek, hem kurumnar da ilerleyecek, nışannadı proektın menecerı Vitaliy Burlaka.
“Şarap kurumnarın bir payı şindän sora pay alȇrlar proekttä, onnar imzaladılar memorandumu baalantılar için da kurdular klastȇrı. İleri dooru olacek platforma ki tutturmaa hem vermää subsidiyaları şarapçılık turizmasına. Ama biz akţȇnt yapȇrız küçük kurumnara da, ki ilerletmää bu uurda da potenţıalı, da açmaa turistlrerä bizim regionu ii taraftan”, — haberledi Vitaliy Burlaka.
Proekt yapılȇr barabar Rumın kollegalarınnan, angıları nışannadılar bizim regionun meraklıını hem şarap, hem kultura kurumnarın özeliini.
“Bu proektin içindä biz geçirdik aaraştırmaları Rumıniyaya Vasluy, Galaţ hem Yassı bölgelerindä. Biz belli ettiki turistik marşrutlarını. Bu işlerdä pay aldılar universitetlerin üüredicileri da. Bulunduk Moldovada, baktık marşrutları — pek meraklı”, — paylaştı proektin piar menecerı Rumıniyadan Ozna Dajbog.
Moldovanın şarapçılık yolu 1560 kilometra, angısına girer üç bölge: Valuluy Trayan, Kodru hem Ştefan Vodȇ. Turistlerin var kolaylıkları üürenmää diil sade nicä büüderlär üzümneri, ama yapȇrlar, kulturayı hem adetleri bizim regionda. Nicä nışannadı Vitaliy Burlaka, bizim kurumnarın potȇnţıalı bütündän taa diil açık.
“Şarapçılık turizması pek üüsek uurda Moldovada, ama bän düşünerim, ani potenţıal taa diil açık bitkiyadan. Büünkü vakıda bizdä var kaliteli şaraplar, halkarası ödüllärlän, ama bizdä büün yok kolaylık professional uurunda vermää çok insana kolaylik almaa becermek turistik marşrutlarında”, — haberledi Vitaliy Burlaka.
Proekt finanslanȇr Evropa birliinän Eni Moldova — Rumıniya programmasına görä. Hep ölä proektä görä pay alannarın olacek kolaylıkları haberlerdän kaarä finans yardımını da kabletmää.
Источник grt.md
