Moldova daacıları Türkiya kollegaların becermeklerinnän tanıştılar
Moldova daacıları Türkiya kollegaların becermeklerinnän tanıştılar. Delegaţiyaya girdi 7 kişi, birisi onnardan Çadır – Lunga dolayın daacısı. Ne onnar üürendilär çözmää deyni ȇkologiya problemalarını avtonomiyada, üürendi Polina Barbova.
Türkiya devletin uzmannarı yollandıraceklar Gagauziyaya daa çorbacılıına tehnikayı hem tohumnarı ekmäk için. Bölä annaşmakları «Мoldsilva» kurumun hem Türkiya devletin daa çorbacılıın uzmannarın aralarında kuruldu.
«Barabar üürenecez bizim durumu da kararlayacez, nesoy çeşitlär bizä taa lääzım. Neçinki klimat diişer, da sade ondan sora çekedecez çalışmaa bu uurda», — habrledi Çadır – Lunga dolayın daa çorbacılıın uzmanı Konstantin Garçu.
Komrat daa kurumun öndercisi Aleksey Kulikov nışannadı, ani Türkiya devletin uzmannarın becermekleri yardımcı olacek avtonomiyanın daacılarına.
«Biz göreriz, ne olȇr solun temperaturasınnan bizim üülen tarafımızda, yamurlar yok, kuraklık. Güzä sa lääzım ekmää tohummarı, lääzım olacek diiştirmää erli büümneri, neçinki hepsi tutulmȇȇrlarlar. Biz ekeriz, ama göreriz ne olȇr», — açıkladı Aleksey Kulikov.
Türkiya devletin uzmannarın becermekleri regionun daacıları neetlenerlär kullanmaa hergünkü işindä.
«Onnar tanıştırdılar bizi, nesoy onnarda çalışȇr pitomnik, nicä hazırlȇȇrlar tohumnarı, nicä büüderlär, nicä ekerlär. Gösterdilär, nasıl bayırlarda çalışȇȇr mini — ȇkskavatorlar, terassa yapȇrlar. Onnar dikerlär 1950 metradan 1970 metraya kadar daaları», — annattı Çadır – Lunga dolayın daa çorbacılıın uzmanı Konstantin Garçu.
Konstantin Garçu annattı, ani «Molsilva» kurumu barabar ȇkologiya Ministerliinnän hazırlȇȇrlar memorandumu, nedän sora uzmannar Türkiya devletindän geleceklär Gagauziyaya.
Источник grt.md 27.06.2022