Literatura kafesindän “GagauzLogika” intelektual oyununa kadar
Kongaz Todur ZANET teoretik lițeуindä birkaç maanalı sıra yapıldı, ani adandı Gagauziyada “Ana dili” yortusuna hem da gagauz yazıcısının hem bilim adamının Dionis TANASOGLUnun duumasının 100-cü yıldönümünä.
“Dionis TANASOGLU – üüredici, yazıcı, kompozitor, rejisör” sırasında Çiçek ayın (aprel) 20-dä lițeydä yapıldı bir “GagauzLogika” intelektual oyunu, ani adandı “Ana dilim – evimdä, canımda, halkımda” yortusuna hem angısında pay aldılar lițeyin 10-12-ci klasların üürencileri. Oyunu hazırladı hem geçirdi gagauz dilindä hem literaturasında üürediciyka Mariya İlyiniçna DUŞKOVA.
Lițeyin üüredicilerindän hem öndercilerindän kurulan juri urguladı, ani “GagauzLogika” intelektual oyununda pay alan komandalar kendilerini gagauz dilin gramatikasında pek akıllı gösterdilär hem da derin bilgilär açıkladılar gagauz literaturasında hem gagauz adetlerinnän kulturasında.
Oyunun herbir basamaanda komandalar, neredä sä, biri-birinin topuklarına basardılar. Ama oyun – oyundur, var enseyän hem geeri kalan. Sonunda “GagauzLogika” intelektual oyununda komandaların aralarında erlär bölä payedildi: I-ci er – “Aslannar” (12-ci klas), II-ci er – “Tırla uşakları” (10-cu klas), III-cü er – “Perdä” (11-ci klas).
Hep “Ana dili” yortusunan ilgili olarak, Çiçek ayın (aprel) 18-dä, gagauz dilindä hem literaturasında üürediciyka Mariya İlyiniçna DUŞKOVA açtı literatura kafesinin sıradakı toplantısını. Bu kerä literatura kafesindä uşaklara annadıldı gagauz yazıcısının, akademik Todur ZANETin yaratmaları hem incelendi “Ana Sözü” gazetasının yazıları. Literatura kafesindä üürencilär annattılar Todur ZANETin peetlerini hem soruş-cuvap bölümündä pay aldılar.
İvanna UZUN, Todur Zanet teoretik liţeyin istoriyada üürediciykası
Источник anasozu.com 23.04.2022