Kultura bölümü 2021 yılın çıkışlarını temsil etti
Gagauziyanın Kultura evlerin çöyuna lääzım remont yapılsın. Bunu için haberledi Gagauziyanın kultura Bakannıın başı Marina Semönova, temsil edärkana kultura bölümün çıkışlarını 2021 yılı için. Geçmiş yıl dolay bücetindän Kultura evlerin tertiplemäk işlerinä verildiydi 2,5 million ley.
Kimi dolay Kultura evlerin binaları şindiki zaman bulunȇrlar kötü durumda. Gagauziyanın kultura Bakannıın başı Marina Semönova nışannadı, ani bu problemanın çözülmesi ön daavaların aarasında bulunȇr.
MARİNA SEMÖNOVA Gagauziyanın kultura Bakannıın başı: «Belli, ani avtonomiyanın 10 kultura evi bulunȇrlar ii durumda. 7-dä lääzım üstün remont geçirlensin, taa edi Kultura evindä derindän düzücülük işlär lääzım geçirsinnär. 2 ev daalȇr hem birisini dä 2018-ci yılda taa yıktılar».
Bütün yıl Gagauziyanın Kultura evleri kendi oluşlarını onlayn geçirdilär. Bölä formatta geçtilär ustalık dersleri, yaradıcılık yarışmaklar geçirlendilär, konţert programaları gösterlendilär. 2021-ci yılda Gagauziyanın Kultura Evleri bindän zeedä kultura oluşlarını geçirdilär.
MARİNA SEMÖNOVA Gagauziyanın kultura Bakannıın başı: «Herzaman ofiţıal saytımızda türlü oluşları için haberleri erleştireriz, bizim yaradıcılık takımnarın işleri için. 376 oluş onlayn rejimdä geçirlendi geçti yıl. Onnarı internetta 469 siiredici baktı. Hepsi vidiolar 3 milliondan zeedä keret siiredildilär».
2021-ci yılda 6 yaradıcılık kolektiv attestaţıya geçtilär kabletmää deyni adı «Obrazţovıy». Bütün yılın çıkışlarına görä 42 takımlarda var bu ad. Onnarın arasında uşak oyun takımı » Vdohnovenie».
SVETLANA SARI « Vdohnovenie» uşak oyun takımın başı: » Biz çok yıl çalıştık kabletmää deyni bu adı. Uşaklar da bekledilär. Biz diil seftä geçeriz attestaţıyayı, ama sade bu yıl onu geçtik. Sanȇrız, ani şindi primariya bizi da taa sık esap alacȇk. Geçän yıl zordu, ama dayman pay aldık türlü onlayn oluşlarda, ama görerim, ani uşaklar özledilär sţenayı».
Bakmayarak hepsi Covid-19 — lan baalı zap etmeklerinä, Kultura evleri vakıdında hem başarılı kendi plannarını aslıya çıkardılar. Yılın süresindä geçirlendi önemli oluşlar –ölä nicä Ana Dili, Hederlez, Gagauz şarap yortusu, Moldovanın baamsızlıı günü, Gagauziyanın kuruluş günü.
Источник grt.md
