Kuduzluk hastalıınnan güreşmäk günü
Ceviz ayın 28 – dä bütün dünnedä bakılȇr kuduzluk hastalıınnan güreşmäk günü. “Kuduzluk: saalık, sıfır ölü“ bölä devizin adı bu yıl. Toplantı adalı yokketmää bu hastalıı nicä insanda, ölä dä hayvannarda. Bitki iki yıl Moldova devletindä sayıya koyulmadı hiç bir da insan kuduzluklan ulaşmadı, hasta hayvannarın sayısı sa iisildi dört okadar. 2021 – ci yılda dolay medik – sanitar kurumnarı sayıya koydular 4 bin kuduzluk olayını. Uzmannarın laflarına görä, kuduz hastalıını var nasıl durgutmaa. Vakţina kuduzluk hasatalıından koyulȇr parasız. Temayı ilerleder Polina Barbova.
Kuduzluk sayılȇr infekţiya hastalıı, angısı bozȇr nerva sistemasını, da olay biter ölümnän. Onu kızıştırȇr rabdan virusu, haberledi Komrat Saalıı korumak cümnä merkezin ȇpidemiolog- doktoru Elena Dülger.
ELENA DÜLGER Komrat Saalıı korumak cümnä merkezin ȇpidemiolog- doktoru: — «İnfekţiyanın sızıntısı sayılȇr yaban hayvannarı, angıları ulaşık kuduzluk hastalıınnan. Bölä yaban hayvannarı nicä yabanılar, tilkilär, şakallar. Kimi devletlerdä uçan sıçannar da . Ev hayvannarı bulunup insannarın arasında, tırmalȇȇrlar, dalȇȇrlar, ta siirek tükürlüklän ulaştırȇrlar insannarı da».
Kuduzluk hastalıın orta inkubaţiya zamanı kurȇr üç aftadan altı aftayadan. Bu baalı hayvanın dalamasından.
ELENA DÜLGER Komrat Saalıı korumak cümnä merkezin ȇpidemiolog- doktoru:-«Kuduzluk hastalıından insanda çekeder belli etmää nerva acıları, nedän sora var nasıl insan kuzsun, yada kuzçä kalksın. Hastanın kaybeler uykusu, aalaşȇr ufkalıına, sert olȇr, da çekeder insandan kaçmaa. İki, yada üç gündän güdenin temperaturanın kalkınmasından aalȇr büük korku».
Ölüm geler erli vakıdında aş koyulmadısaydı . Var yavaş hem da sert kuduz hastalıın formaları, nışannadı imäk malların korumasında Millet agentstvosunun uzmanı Andrey Kurka.
ANDREY KURKA imäk malların korumasında millet agentstvosunun uzmanı: — «Ta zeedä hayvannarı ulaştırȇrlar tilkilär, angıları raat- raat gezerlär türlü yaşamak erlerindä, nicä küüyülerdä, ölä dä kasabalarda. Onnar bulunȇrlar barabar kedilärlän, köpeklärlän. Erlim onnar dilsäydilär aşlı kuduzluk hastalıından, o zaman 14 günün içindä var nasıl ulaşsınnar. Hayvannar var nasıl yaklaşsınnar insana, yalasınnar onnarın ellerini, suratlarını. Hiç bir zaman diil lääzım yaklaştırmaa onnarı».
İnsandan insana kuduzluk hastalıı geçmeer.
Источник grt.md 29.09.2022