Kongazın Todur ZANET adına teoretik lițeyin 180-ci yıldönümü yortusu

Kırım ayın (dekabri) 18-dä kongazlılar hem Kongaz küüyün Todur ZANET adına teoretik lițeyinä gelän musaafirlär bu lițeyin 180-ci yıldönümü kutladılar, sayarak o zamandan, açan țarlı Rusiyanın devlet varlıı ministrusunun Pavel Dimitrieviç KİSELEVun 1841-ci yılın emirinä görä Basarabiya guberniyasının 21 küüyündä (koloniyasında) kliselär yanında lankaster şkolaları açıldı. O 21 küüyün arasında Kongaz küüyün da birinci şkolası vardı. Büünkü gündä, klise yanındakı lankaster şkolası olarak yola çıkarak, bu şkola başlangıç şkolasından 7 klaslık şkolaya, sora 8 klaslık, sora da orta şkolasına (1-ci şkola) etişip, son-sonunda lițey oldu.
Bu büük yortunun başında Todur ZANET adına teoretik lițeyin direktoru Mariya Dimitrievna ÇEBANOVA, nicä düşer sıralarımıza görä, kolektivın hem üürencilerin adından tuz-ekmeklän hem lițeyin “Centelmennär Klubu” azaların selämnemesinnän karşladı lițeyin o günkü büük musaafirlerin: Gagauziyanın Başkanını İrina VLAHı, Gagauziyanın üüredicilik Upravleniyasının Başını Natalya KRİSTEVAyı, Türkiye Komrat Başkonsulunu Hasan AKDOĞANı, Gagauziya Halk Topluşun deputatlarını Svetlana DÜVENCİyi hem Demyan KARASENİyi, Kongaz küüyün primarını Mihail ESİRi, şkolanın eski direktorunu Nikolay STOYANOVu, Akademii hem yazıcıyı Todur ZANETi.
Büük sevilenmeliklän karşlandılar yortuya gelän lițeyin veteran üüredicileri, birinci klise yanındakı lankaster şkolasının kanadı altından çıkan hem taa sora kurulan Kongaz Nikolay ÇEBANOV adına gimnaziyasının (2-ci şkola) direktoru Mariya Grigoryevna PULUKÇU hem Kongaz Varvara TOPAL adına gimnaziyasının (3-cü şkola) direktoru Olga Petrovna ÇEBANOVA, Kongaz Suleyman DEMİREL adına lițeyin ön edän direktoru Anna Födorovna MİNKU, analar-bobalar, ana-boba komitetın azaları, küüyün uşak başçalarının zaametçileri, lițeyi başarannarı.
Hepsi musaafirlerin güüslerinä takıldı lițeyin embleması hem onnara baaşlandı maasuz yapılı lițeyin emblemasınnan suvenirlär hem vımpellar. Bundan zeedä, giriştä onnarı, Moldovanın hem Gagauziyanın Bayraklarından kaarä, Todur ZANET adına teoretik lițeyin dä Bayraa karşladı. Kutlamalar sırası arasında lițeyin direktoru Mariya Dimitrievna ÇEBANOVA bildirdi, ani lițeyin emblemasının hem Bayraanın avtoru Akademik Todur ZANET.
Nicä yaraşêr bölä büük lițeyä, onun kolektivı, sansın düün sırasına gibi, pek gözäl hazırlanmıştı bu yortuya: herersi tertipliydi, üürencilär hem üüredicilär yakışıklı hem kıvrak giimniydilär, hayatlarda hem duvarlarda sergilär bulunurdu, herbir klas kendi üüretmäk uuruna görä donaklıydı hem üüredicilär, musaafirleri karşlayıp, üüretmelerinin incelikleri için annadırdılar.
Ayırı hem meraklı tanışmaklar oldular lițeyin bibliotekasınnan hem muzeyinnän, kompyuter klasınnan hem robototehnika yaratmalarınnan, lițeyin maasuz futbol klasınna gidän futbolcularlan hem onnarın trenerınnan.
Bu meraklı gezmäk hem tanışmak programasından sora, lițeyin stolovasından gelän gözäl kıırma kokusu içindä geçeräk, musaafirlär hem lițeyin kolektivı toplandılar aktovıy zala, neredä uzun bir kutlama hem da anma sırası oldu hem lițeyin o günkü musaafirleri, arada nasaat ederäk, kendi dilemelerini hem baaşışlarını 180-ci yıldönümü kutlayan Todur ZANET adına teoretik lițeyinä baaşladılar. Kutlamalara, onlain olarak, katıldılar lițiey bașaran hem büünkü gündä lițeyi canında taşıyan vıpuskniklär da: daavacı Grigoriy KOLEV, “Düz Ava” ansamblisinin solistı Andrey İVANOV, polițiyacıyka Mariya DUŞKOVA hem başkaları.
Lițeyin yaşaması ileri dooru da tatlı hem datlı olması için, şkolanın ana-boba komitetı hazırlamış hem baaşladıl şkolaya büük bir tort, angısında yazılıydı: «Родная школа, с Днём рождения!» (“Ana şkolamız, duuma günün kutluca olsun!”). Bu tortu da, düündä ballama adeti gibi, sıranın sonunda hepsi üüredicilerä dattırdılar.
Patretlär: anasozu.com, Darina Duşkova, İvanna Uzun
Источник anasozu.com 19.12.2021