Kongaz moldo-türk liţeyi Türkiye gençlik hem sport yortusuna baalı marafonu geçirdi
Kongaz moldo-türk liţeyin üüredicileri hem üürenicileri nışannadılar Türkiye devletin gençlik hem sport gününü. Onnar geçirdilär uzun distanţiyaya marafonu. Bu gün hep ölä anȇrlar Mustafa Kemal Atatürkü. Yortu Türkiyedä bakılêr hederlez ayın 19-da.
1900 metraya marafon geçirildi Kongaz moldo-türk liţeyinın üüredicilerinnän hem üürenicilerinnän. Onun baş neeti — gençleri sportlan meraklandırmaa hem saalıklı yaşamayı göstermää.
«Sport günündä biz yarışmakları geçireriz. Perşembä günü 190 metralık kısa kaçmayı yaptık kim taa kısa vakıtta onu kaçacak. Şindi bu afta kararladık 1900 metraya, uzun distanţiyaya kaçmaa. Kattık herbir klastan üürenicileri. Gösterelim isteeriz spordun önemliini. Bu gün Sport bayramı Türkiyedä», — açıkladı liţeyin üüredicisi Ali Özpala.
Bu gün adalı Mustafa Kemal Atatürkün danışmasına 1919-cu yılın hederlez ayın 19-da Samsun kasabanın gençlerinä, neredä o haberledi mobilizaţiya için ki kalkıntıları ensemää. Bu gün Tirkiyenın istoriyasında bakılêr nicä cengin çeketmesi.
“Bu yıl başka türlü bakacez bu bayramı. Bizdä kaçmak marafonu 1900 metraya. Anêrız Mustafa Kemal Atatürkü, angısı gençleri topladı, ki kazanmaa Türkiyenın baamsızlıını hem ensemää savaşı”, — haberledi liţeyin başı Êngin Alla.
Yortu ilk sefer bakıldı hederlez ayın 24-dä 1935-ci yılda, nicä “Atatürk günü”. Bu gün İstambulda “Galatasaray” hem “Fenerbahçe” komandaları sport yaraşmaklarını geçirärdilär. Sport kongresi birkaç aydan sora geçirildi diiştirmää yortunun adını, da hederlez ayın 19- Sport gününü belli etmää.
Artık çok yıl sıravardı gençlär bakêrlar bu günü. Marafonda pay aldılar üürenicilär herbir klastan.
“Pek beendim, ilktän zordu, ama sora hızlandım, kuvedimi topladım, da ilk geldim”.
“Umudum yoktu, ani pay alıp nesoysa er alacam, ama aldım”.
“Hoşlandım yaraşmadan, memnun kaldım, ii geldi”.
“Sport önemli saalıımıza hem yaşamamıza deyni. Bän savaşêrım her afta biraraz kaçmaa, sport yapmaa”.
“Şindi gençliimizdä sport lääzım yapalım, ani ihtiarlıımızda hem orta yaşımızda saalıımız ii olsun”.
Bu olayın baş neeti — göstermää sportun önemliini gençlerin arasında. Türkiyeda bu gün bakılêr bir afta, türlü yaraşmaklara hertürlü yaşta yaşayannar katılêrlar.
Источник grt.md
