Kongaz hem Kirsovo küülerindä bulunan Ukraina vatandaşları için merkezlär eni yardımı kablettilär
Kongaz hem Kirsovo küülerindä Ukrainadan cenktän kaçannarı kabledän merkezlär kablettilär yardımı. Onnara tedarlıkları baaşladı cümnä organizaţiyası “Bucak” barabar Türkeyedeki ortaklarınnan. Bu sefer verildi ii koşulların kurulması için buz dolapları hem çamaşır maşinaları.
Merkezlerin öndercileri danıştılar cümnä organizaţiyalarına, ki verilsin onnara yardım tedarlık tarafından.
“Bizim zorluumuz vardı buz dolaplarında. Biz danıştık bizim ortaklarımıza Türkiyeden, ki yardım versinnär bizä. Onnar annadılar, ani sıcaklar gelerlär, da imeklerin tutması için lääzım buz dolapları. Drurmumuzu annayıp getirdilär”, — açıkladı Kongazda bulunan kaçannar için merkezin başı Maksim Bolgar.
Taa ileri Türkiye tarafı artık verdi material yardımını Ukrainadan kaçannara deyni. Merkezlerdä, neredä erleştilär kaçannar, baaşlandı çarşaflar komplektları, imäk malları, himiya hem başka lääzımnı tertiplär. Bu sefer Türkiye tarafı kararladı vermää iki dolaplı kameraları imäk malların koruması için hem giisileri yıkamak için tedarlıkları.
“Biz alındık yardım etmää kaçannara komuşu Ukrainadan. Hızlı bizim teklifimizä katıldılar dostlarımız Türkiye devletindän. Biz artık burada açtık tutturmak fondunu, kaçannar için. Da böleliklän savaşêrız onnara yardım vermää”, — “Bucak” cümnä kurumun öndercisi, söledi Agası Hun.
4 uşaan anası Ekaterina geldi Gagauziyaya Ukrainanın Odessa dolayından. Seçti avtonomiyamızı kızkardaşının nasaatına görä. Burada çokuşaklı ana kolay erleştirdi okula evlatlarını da.
“Koşullar pek ii, taa dooru pek islää, hepsini yapêrlar uşaklaramıza deyni, yardım ederlär, nezaman istesäk, herzaman tutturêrlar”, — söledi Ekaterina.
Yaşamak koşullarınnan kayıl 9 uşak anası da, angısı geldi Gagauziyaya Arţız kasabasından, Yuliya. Ona sıra geldi brakmaa Odesa dolayında bulunan evini, çünkü raketalar daattılar su vermäk sistemasını hem başka önemli infastruktura obyektlerini.
“Hepsini beendim, sayışêrlar bizimnän. Ne vardı kuvetleri verdilär. Biz burayı geldik bişeysiz, bir parasız çıktık. Uşakları da brakmêêrlar”, — annader Yuliya Plehova.
Yardım veridli Kirsovo küüyün merkezinä da, neredä erleştirildi Ukraina vatandaşları.
“Pek önemli, ani bölä durumda hepsi annaşıp, kolaylıkları bulêrlar da yardım ederlär bu insannara. İsteerim şükür etmää “ABC” kurumunu, çünkü pek büük zorlumuz vardı buz dolaplarında, hem çamaşır yıkamak maşinalarında, bizim onnar çok kişilerin kullanması için başladılar enseyamemää, şindi sa var büük tedarlıklarımız, ne kolayladacek bu insannarın yaşamalarını burada”, — söledi Ukrainadan kaçannarı kabledän merkezin başı Kirsovo küüyüdä Svetlana Georgieva.
Nışannayalım, ani Gagauziyanın Bakannık komitetı kararladı açmaa avtonomiyada kaçannarı kabletmäk için merkezlerini, ki burada erleşäbilsinnär küçük uşaklaran insannar. Nicä nışannadılar merkezlerin öndercileri, bitki vakıtlar belli edildi onnarın gelmesi hem zeedelenmesi Gagauziyada.
Источник grt.md
