Komrattakı koledj dokumentleri başladı kabletmää
Mihail Çakir adına koledj Komratta aftanın çeketmesindän başladı 2022-2023 üürenmäk yılına dokumentleri abiturientlardan kabletmää. Bu yılkı eniliklär için bizim ilerki süjedımızda.
Bu yıldan başarannar, kim ister komrattakı koledjda üürenmää, var nasıl dokumentlerini diil sade komisiyaya versinär gelip üüretmäk kurumuna, ama onlayn formatında da. Bu enilik o sebeplän yapılı ki dokumentlerin vermäk proţesini taa çok insana ilinnetmää, nışannadı «Gagauziya Gün Gündän» programasının süresindä Mihail Çakir adına koledjın başı Mariya Tanasoviç. Hepsi lääzımnı dokumentlerin listesi koledjın saytında var nasıl bulmaa.
MARİYA TANASOVİÇ, Mihail Çakir adına koledjın başı Komratta: «Var Moldovanın vatandaşları, angıları şindi aşırıda bulunȇr, Rusiya devletindä, Ukrainadan isteyennär var, onnardan bizä danışmak koledjda üürenmää deyni geler. Bu uşaklar, bulunarak başka devletlerdä hep ölä konkursta pay alsınar».
Mariya Tanasoviç urguladı önemni işi ki bakmayarak ona, ani başarannar var nasıl dokumentlerini onlayn versinär, hep okadar açan annaşılȇr ki konkursta taradılar da studentlerin listesindä bulunȇrlar, bundan sora 3 günün süresindä lääzım koledja 9 klasın bitirmesi için dokumendin originalını getirsinär. Ya bunu yakındakı insannarı var nasıl yapsınar. Er bunu etiştirmeyeceklär yapmaa, bu üüreniciyi var nasıl listedän silsinnär. Koledjın başı annattı ki sebep buna o, ani isteyennerin sayısı taa çok nekadar üürenmäk erleri türlü zaanatlarda, angılarını verer Üüretmäk ministerlii.
MARİYA TANASOVİÇ, Mihail Çakir adına koledjın başı Komratta: «Bütünnä 170 üürenmäk eri ministerlik bu yıl koledja verdi, var hem kontrakt hem büdjet erleri. Otuzar kişi hepsi grupalarda olacek, sade muzika öndercisi zaanadında 20 kişi. Pedagogika zaanatlarında 60-70 proţent büdjet erleri veriler, turizm zaanatına 8 büdjet eri, administrativ koşulları hem sekretariat 7 er, soţial uurunda uzmanı 7 büdjet eri».
Lääzım nışannamaa, ani komisiyanın ilk işlemäk günündän 70 zeedä 9 klasların başarannarı, angıları ister Komrattakı koledjında üürenmää, dokumentlerini getirdi.
Kabletmäk komisiyası koledjda 3 afta, harman ayın 6-dan işleyecek. Bundan sora, elektron sistemasının yardımınnan kabledilän studentlerin listesi belli edilecek.
Mihail Çakirin adına koledjı Komratta 6 zaanata dokumentleri kableder: uşak başçasında terbiedici, muzika öndercisi, ilk klaslarda üüredici, turizm, sekretarlık hem soţial uurunda uzman.
Источник grt.md 25.07.2022