Komrattakı 9-cu uşak başçası kabledecek 9 mln ley “Evropalı küü” programasından
Duvarları yısıtmak materiallarınnan sarması, örtünün kimi erlerdä diiştirmesi. Bölä işlär lääzım yapılsın “Evropalı küü” milli programasına görä Komrat kasabasının 9-cu yaslasında. Taa derindän annadȇr Natalya Andrieş.
Proektin yapılmasını 9 – cu uşak başçasında baktılar erineki kuvetlär buluşmakta Moldova parlamentin üüretim, aaraştırmak hem sport işlerindä herzamankı komisiyasının temsilcilerinnän. Onun başı Liliana Nikolaesku – Onofrey nışannadı, ani onnara pek önemliydi görmää eri, neredä “Evropalı küü” proekt giriştirilecek.
LİLİANA NİKOLAESKU – ONOFREY, Parlamenttä üüretim, aaraştırmak hem sport işlerindä komisiyasının başı: «Bizä pek önemliydi kollegalarlan parlamenttän tanışmaa primariyanın temsilcilerinnän, görmüü obyektı neredä yapılacek düzmäk işleri. Bu dokuzuncu uşak başçası. Da biz sevinecez erlem bu proekt yapılarsa ölä nicä bunu gördü hükümet hem primariya».
Kendi sırasında primar Sergey Anastasov gösterdi umudu, ani proekt yaslanın düzülmesindä bu yıl yapılacek.
SERGEY ANASTASOV, Komrat kasabasının primarı: “Umutlanȇrız bu proekt giriştirilecek bu yıl, ki uşak başçası işlesin ileri dooru. 9-cu uşak başçası en büük Gagauziyada. En çok uşak gezer burayı.”
9 million leylik proekt. Bu bir büük yardım yaslaya, neredä 40 yılın içindä binaların düzülmesini geçirmedilär, annattı bu kuruun başı Anna Kroytor.
“Masalcık” uşak başçasında kaldı iki blok, neredä yok çadır formasında örtü. Her yıl primariyanın yardımınnan burada örtüleri düzerlär, ama bakmayarak buna yaamurlar açan yaayerlar, su sızȇr beton plitalardan grupalara. 6 grupada var zamandaş yısıtmak sisteması, kalannarda eski batareyalar. Bunun için sıcaa arttırmak proekti verecek kolaylık diil sade sıcaa, ama paralara da ekonomiya yapmaa, söler Anna Kroytor.
Yısıtmak materiallarlan duvarların sarması diişterecek dışandan binaları da söler yaslanın başı. Remont işleri başladıynan yaslanın uzmannarı dinnenmeya gideceklär, haberledi Anna Kroytor.
“Evropalı küü” programası giriştirilecek Gagauziyanın 19 yaşayan punktunda. Proektların yapılmasına avtonomiyaya verilecek 71 million ley. Ama bütün devlettä yakın 500 küü katılȇr bu proramaya da proektların yapılmasına erideki hem regional ilerlemäk milli fondundan verildi 670 million ley.
Источник grt.md
