Komratta üürenicilär oynadılar futbol veteranı Nikolay Tretyakovu anması için turnirdä
İlerletmää deyni sportu Gagauziyada geçirilerlär türlü sport olayları. Büük Vatan Cengin veteranının Nikolay Tretyakov adına liţeyindä geçti onu anmak için futbol turnirı. Nikolay Tretyakov verdi kendi yaşamasını koruyarkana Komrat kasabasını. Yarışmaklarda pay aldı 5 komanda kasabanın şkolalarından.
Nikolay Tretyakov adına liţeyin stadionunda toplandı 5 futbol komandası kasabanın üürenmäk kurumnarından, ki belli etmää en kavileri bu sport uurunda. Olayın baş neeti — meraklandırmaa uşakları istoriyaylan, insannarlan, angıları verdilär yaşamaklarını, ki biz yaşayalım uslulukta. Futbol turnirın geçirmesinin ideyası peydalandı okulun üüredicisindä Nikolay Sariogluda.
“Bu yıl bizim liţey başladı işlettirmää programmayı “futbol her bir klassa”. Bän bu okulda çalışȇrım bir yıl, da onun içindä biz geçirdik bir turnir başlankı klaslarda, bu pek ii çıkış, uşaklar pay alȇrlar turnirlarda. Büün biz geçireciiz 4-5 klasların aralarında”, — açıkladı Nikolay Sarioglu.
Liţeyin başı Polina Pıntä nışannadı bölä oluşların önemliini uşaklara deyni. Uşaklar bulȇrlar eni dostları, en önemli da , ani saalıklı yaşȇrlar sportlan zanaatlanarkana.
“İdeyayi verdi bizim saalıı hem güüdeyi kaaviletmäk dersleri üüredicimiz hem trener Nikolay Sarioglo. Biz savaşardık tutturmaa onu hem çıkarmaa aslıya bu işi. Bu oluşta pay alȇrlar hepsi liţeylär dä isteerim şükür etmää onnarın başlarını, ani katıldılar oluşa”, — söledi liţeyin başı.
Turnirın süresindä geçti diil bir matç, hepsi uşaklar savaşardılar oynamaa bütün kuvetlän da göstermää, ani maasuz onnarın komandası, okulu en kaavi. Oyunun süresindä oldular gözäl gollar, duyulardı kızgınnık.
“Biz geldik Karaçoban adına liţeyindän ki göstermää , nicä lääzım taramaa, biz oynayacez”.
“Bän geldim burayı taramaa. Bän beenerim turnirı, futbolu. Geldim Karaçoban adına liţeyindän”.
“Biz geldik oynamaa turnirdä. Bän beenerim futbolu. Dinnernerim oynarkana hem geldik taramaa”.
Turnirin daavacısının sportçunun Sergey Roşkanın laflarına görä, tanıştırmaa uşakları futbollan bu ii adet. Da erlem onnarı taa küçüktän üüredärsaydık götürmää saalıklı yaşamayı, ozaman olacek saalıklı evlat boylarımız, sayȇr sportçu.
“Bän sayȇrım, ani bu olay pek önemli uşaklara deyni, neçinki uşaklar eni becermeklärlän tanışȇrlar, oynȇȇrlar biri-birinnän. Bana pek ii bulunmaa burada da götürmää daava uurunu. Getirerim aklıma kendimi, bän sevinärdim oynamaa, ama bizdä yoktu professional davaacılar”, — annattı Sergey Roşka.
Komratta sportun ilerletmesini alȇrlar esaba. Bitki on yılın içindä sport meydannarın hem futbol meydannarın sayısı kasabada zeedelendi. Primar Sergey Anastasov kendisi bol vakıdında sport yapȇr, oynȇȇr futbol hem voleybol.
“Bizä pek islää görmää sizin okulunuzda bukadar komanda, da isteerim şükür etmää hepsi üürenmäk kurumnarın başlarını, ani verdilär kolaylık komandalara pay almaa bu olayda. Ne baalı futbollan, kasabada var çok futbol meydanı, taa düzecez dä, ki insannar zanaatlansın sportlan. Hepsinä büük becermeklär hem taramaklar isterim”, -sölediprimar.
Oyun meydanında üçüncü er için karşı karşıya geldilär Dm. Karaçoban hem G. Gaydarjı adına liţeylerin üürenicileri. Oyun kızgındı hem meraklıydı. Matçın bitkisinädän sayı 1:1 oldu. Ama bitki sekundada D. Karaçoban adına liţeyin komandası urdu taa bir gol da kazandı üçüncü eri. Matçın sayısı sayıylan 2:1 bitti.
İlk er için güreştilär N. Tretyakov hem M. Emineskun adına liţeylerin futbolcüları. Oyun meraklıydı. Uşakların üzündä sevinmelik hem istemäk taramaa görünärdi. İlk eri kazandı N. Tretyakov adına liţeyin komandası. İkinci erä kaldı M. Eminescu adına liţeyin futbolcuları.
Yarışmakların çıkışlarına görä hepsi kabletti diplom, ödül hem komandadan komandaya geçän kupayi. En önemli, ani uşaklar kablettilär ii duyguları hem dostlaştılar. N. Tretyakovu anmak turniri geçirilecek her yıl.
Источник grt.md
