Komratta risk altına düşän uşaklar için maasuz merkez açılacek

Komrat kasabasında kurulacek yardımnamak merkezi, neredä olacek kolaylık erleştirmaa o uşakları, angıları bakımsız kaldılar ana — boba tarından, ya da başka manalara göra zor durmda bulunerlar.
Böla bir merekzin açılması çok önemli Komrat dolayı için, zera bırda 146 ayıla hem 393 uşak risk altında bulunȇrlar. Bunun için annattı Komrat dolay administrațiyasının başı İvan Topal.O açıkladı, ani bu bir ortaklık proekt, angısı yapıler «Vesta» cümna kurumun yardımınnan.
«Pek hem çoktan lääzımdı bu proekt. Biz bir yıl işledik “Vesta” kurumunnan. Bulduk maasuz eri, ilkin 8 uşak için. Çocuklara hem kızlara ayırı odalar lääzımnı koşullarlan olacek”, — açıkladı İvan Topal.
Bu merkezdä uşaklar bulunabileceklär bir vakıt. Burada onnarı kooruntu altına alaceklar, besleyeceklär, yaşamak için er yapılacek, medik izmetleri verilecek, psiho-soţiyal yardımı olacȇk , hem ötää dooru eni ayleya onnarı erleştireceklär. Bunu için haberledi proektın assistentı, psiholog Tatyana Ivanova.
«Açan uşak düşer riskli duruma, deelim, kalȇr sokakta, yada evdän kaçtı, yada başka sebeplerin beterinä, onu buldu polis, ama ne yapmaa ötää dooru? Ayleya uşak o vakıt dönämeer. Da bu noktada pek islää, ani biz başardık. Şanslıyız ani donorlar kayıl oldular işlemää bizimnän, neçinki bu izmet bizä deyni unikal. Da o vakıdadan, açan uşak erleştirilecek patronat aylesinä, var ara, açan onu bakmaa bir uygun er yok. Onuştan bu merkez pek lääzım bizä”, — açıkladı psiholog.
Bu merkezdä 4 yaşından 18 yaşına kadar uşakları olacek kolaylık erleştirmää. Kalaceklar onnar burada ayleya erleşenä kadar.
Komrat dolay administraţiyasının başı İvan Topal açıkladı, ani bu merkezdä uşaklar var nicä olacek bulunsunnar 1 yadan — 6 aya kadar, ama laazımsaydı taa da çok vakıda brakılaceklar. Ama bu vakıdın içindä soţiyal soruşlarında izmetlär barabar polislän laazım olacek çözsünnär problemayi, neredä kalacek uşak.Ya geri kendi aylesina dönecek, ya da başka bir ayleya geçecek yaşamaa.
Risk altına düşän uşaklar için merkez Komratta açılsın deyni çok zaamet koyȇrlar «Vesta» cümna kurumu, Komrat dolay administraţiyası, Gagauziyanın Bakannık Komiteti, Komradın primariyası. Finans tarafından yardım ederlar Evropa Birlii, Soros fondu barabar Keystone Moldova assţiyaţiyasınan hem «Institutum Virtutes Civilis» kurumunnan.
Источник grt.md 06.04.2022