Komratta İnner Wheel halklararası volontör karılar kurumunun bölümü açıldı
Gagauziyada geçti halklararası karıların İnner Wheel kurumunun bülümün açılışı, angısına girerlär sade karılar. Bu kurum çok yardım eder uşaklara, karılara, kim bulunȇr zor durumda hem başka yufka durumda bulunan insannara. Bu yıl kurum tamannayacek 99 yılını kurulmasından. İnner Wheel kurumu çalışȇr 100 devlettän zeedesindä.
İneer Wheel kurumu en büük kurumnarın birisi dünnedä, angısına girerlär volontör karılar. Onnar urguladılar, ani bu klubun yardımınnan karılar kablederlär kolaylık yardım etmää cümneyä, buluşmaa, dostlaşmaa.
İneer Wheel Komrat klubun açılışında pay aldılar delegeţıyalar Azeybardjandan, Rumıniyadan, Bulgariyadan, Ukrainadan hem Moldovadan. Onnarın baş neeti — yardım etmää yufka durumda bulunan insannara.
“Halklararası kurumumuz yardım etmää deyni biri-birinä. Hepsimiz biz çalışȇrız kasabalarımızda, ama geçireriz haklararası buluşmaları, paylaşȇrız bilgilärlän, kablederiz biri-birimizi birtürlü. Bizdä yok politika, yok din, biz hepsimiz karıyız, da bu en önemli”, — açıkladı Bulgariyadan delegaţiyanın temsilcisi Nelli Bratoeva.
“Biz geleriz Azerbaycandan, da tanışȇrız sizin kulturanızlan , sabaa siz tanışacenız bizim kulturamızlan, da butakım halklararası kurumun sloganı “Kaavi karı — kaavi dünnä””, — annatı Azerbaycan delegaţiyasının temsilcisi Leyla Ȇlman.
Bitki yılın içindä kurum aktiv yardım etti cenk kaçannara Ukrainadan, nışannadılar klubların temsilcileri.
“Gücenikliyiz ani oldu bu olaylar Ukrainada, da karılar bütün dünnedän , hepsi İneer Wleel klublarında yardım ederlär bütün kuvetlän. Bu diil sade gumanitar yardımı, bu ilaçlar da, bu arabalar da. Bakmadaan ona, ani biz politika dışında işleeriz,tutturmȇrız bir da politika kurumunu, partiyayı, biz isteriz ki bizim uşaklar yaşasınnar uslulukta, ki bizim dünnä ilerlesin”, — nışannadı Kişinöv İneer Whell klubun prezidenti Aureliya Grigoriu.
“İlk bu klub dostluk için, tanışmak için. İneer Wheel büük klub, angısı çalışȇr 100 devlettän zeedesindä”, — söledi İneer Wheel Moldova – Galaţ kurumun başı Natalya Vavilina.
İneer Wheel Komrat klubun başı oldu Alla Leyçu, angısı topladı dolaynda diil sade biznes karılarını, ama te onnarı da, kim aktiv volontör işinnän zanaatlanȇr.
“Bizim klubta 20 ledi, da klubun baş neeti zanaatlanmaa yardımcılık işinnän, yapmaa ii işleri kolaylıksız insannara, hem hep ölä ilerletmää gagauz — moldvan kulturasını”, — açıkladı İnner Wheel İnternational Komrat klubun başı Alla Leyçu.
Komrat muţipiyasının primarı Sergey Anastasov urguladı, ani karıların rolü cümnedä pek üüsek, da taa bir kurumun açılışı kasabada pek faydalı olacek.
2015 yıldan beeri Kişinöv kasabasında çalışȇr klub, da onun başı büük yardım koydu sıradakı filialın açlışına Komratta. Onun bakışına görä o birleştirecek karıları bütün devlettän.
“Bu klub taa çok karılara deyni. Da biz açtık filialı ki vermää kolaylık karılara olmaa taa yakın biri — birinnän, dostlaştırmaa karıları bütün devlettän da birerdä yapmaa ii işleri insannara dyni, angıları bızım dolayında var”, — söledi İnner Wheel Kişinöv klubun başı Veronika Gulka-Ojog.
Yortulu açılışın süresindä musaafirlär baaşladılar biri –birinä baaşışları hem diplomnarı, hem hep ölä hepsinä deyni Gagauziyanın artistleri gösterdilär konţert programmasını.
Avtor: Z. Kanţır, video: G. Stavilov, montaj: A. Topal
Источник grt.md
