Komratta evin önündä, angısında yaşamış Ludmila Pokrovskaya, koyuldu anmak taftası
Komratta Puşkin sokaanda açtılar memorial taftasını anılmış turkologa, lingvistä Ludmila Pokrovskayaya. Koydular onu Bilim — Aaraştırmak merkezin iniţiativasına görä. Açılışta pay aldılar BAM zaametçileri, KDU uzmannarı, studentları hem te o insannar, angıları onu bilärdilär.
Nicä yazardı Çingiz Aytmatov: “Halkın ölümsüzlüü onun dilindä”. Da bizim dedelär geçirdilär bizim gagauz ana dilimizi asuirlerdän yokkana yazımız, gramatikamız. Yazılı dilin çeketmesi geldi 19 asirin bitkisina hem 20 asirin çeketmesinä. Büük rol bunda vardı rus bilim adamnarında, angıların aralarındaydı türkolog, lingvist, filologiya uurunda Doktor Lüdmila Pokrovskaya da. O braktı bir büük iz gagauz dilin ilerlemesindä, gramatika uurunda, orfografiya, kurdu kuralları hem yardım etti geçirmää alfabeti latin grafikasına. Te onnar, kim maasus bilärdi Lüdmila Pokrovskayayi, büün büük sevgiylän onun için sölerlär.
“Bu bu insan büük bukvadan, angısı braktı büü iz gagauz dilin ilerlemsindä. Bu insan büük sevgiylän çok vakıt geçirdi Gagauziyada. Çalıştı KDU-dä, kurdu gagauz dilin temelini, braktı çok bilim işlerini”, — nışannadı Bilim- Aaraştırmak merkezin başı İrina Konstantinova.
Ȇtnograf, filologiya uurunda doktor Vitaliy Sırf urguladı, ani bilärdi Lüdmila Pokrovskayayi hem o hodullu onunnan, ani Komratta bu insanın oldu kendi köşesi. Bu insan barktı ardına bir büük zenginik, angısını bizim evlat boylarımız kullanacek taa çok asirlär.
Çok yıl Lüdmila Pokrovskaya çalıştı KDU-dä, neredä onun yardımınnan korudular kendi bilim işlerini bizim bilim adamnarı, tarihçilär. O te onnardan biri, kimin yardımınnan açıldı gagauz dili kafedrası. Millet fakultetın dekanı Pötr Paşalı maasus bilärdi Lüdmila Aleksandrovnayı hem çalıştı onunnan birerdä.
“Büünkü oluşun neeti — anmaa, bu insanı, angısı verdi yaşamasını gagauz halkına. Bana sıra geldi onunnan buluşmaa, işlemää. Biz ondan alardık yaşamadan urokları, bilim uroklarını”, — söledi Pötr Paşalı.
Filologiya uurunda doktor İvanna Bankova urguladı, ani Ludmila Pokrovskaya başka bilim adamnarına braktı büük iz gagauz halkın dilindä. Da koyulmuş anmak taftası olacek o er, nereyı geleceklär onun duuma günündä hem geçinmek günündä.
Dil — bu halkın tarihi. Dil-bu yol ţivilizaţiyaya hem kulturaya,sölärdi yazıcı Aleksandr Kuprin. Da klassikacının lafları büün da aktual nicä her keret. Yokkana dil-yok halk.
Lüdmila Pokrovskaya oldu o yıldız, angısı verdi yazılı yaşamayı bizim dilimizä, halk kulturasına. Da herbiri , angısı geçecek bu memorial taftanın yanında, lääzım bilsin, ani bu insan diil lääzım unudulsun.
Источник grt.md
