Komratta «Düz Ava» ansamblisinin kurucusu Semön Pometko için kiyadın prezentaţiyası yapıldı
Komratta «Ömürünü gagauz muzikasına baaşladı» kiyadın prezentaţiyası geçti. Kiyat adalı anılmış Moldovanın hem Gagauziyanın kompozitoruna, «Düz Ava» ansamblisinin kurucusuna Semön Pometkoya. Kiyadın avtoru — onun kızkardaşı Praskovya Kunçeva. Prezentaţiya Komrat kultura evindä yapıldı.
«Ömürünü gagauz muzikasına baaşladı» kiyat gagauzça hem rusça yazılı. Avtor paylaşȇr, ani kiyat birkaç yılın süresindä hazırlandı. Onda o savaştı maȇstronun yaşaması için annatmaa, onun yaratmak yolu için. Bundan kaarä var bölüm kollegaların hem üürenicilerin aklına getirmeklerinnän.
Semön Pometkonun önemli rolünu gagauz kulturasının ilerlemesindä nışannadılar Gagauziya kultura bakannıın temsilcileri.
KDU milli kultura fakultetin dekanı Pötr Paşalı sayȇr, ani herbir halk lääzım kendi kulturasını hem tarihini bilsin hem unutmasın onu. Önemli ki gençlär dä kendi kahramannarını bilsinär.
Gagauziya Halk Topluşu deputatı Nikolay Dudoglo nışannadı, Semön Pometko büün dä insannarın cannarında hem aklılarında yaşȇȇr.
Kendi kollegası için aklına getirmeklerinnän Gagauziya Şannı kultura işçisi Mariya Kıssa da paylaştı. O çok yıl “Düz-Ava” ansamblisinin türküçüsüydü, açan onun öndercisi Semön Pometkoydu. Mariya annattı nekadar incä ürekliydi bu adam.
Kısa yaşamak vakıdında, taa 50 yaşını da tamannamadıydı, Semön Pometko yakın 27 yıl “Düz-Ava” ansamblisin öndercisiydi. Çok anılmış muzikacıları hazırladı, talantlı aranjirovşiktı, folkloristtı, türlü instrumentlerindä oynardı, orkestr için muzika yazardı.
Источник grt.md 07.06.2022