Komratlılar mitingta hükümetä bir sıra istek açıkladılar
Komrat kasabasının meydanında dinnenmäk günnerindä geçti sıradakı miting, angısı baalıydı yaşayannarın bakışlarınnan paaların kalkmasına.
Yaşayannarın mitinglarda pay alması için tekliflärlän çıktılar cümnä aktivisti Mihail Vlah hem Komradın nasaatçısı Vadim Anastasov. Mitinglar Gagauziyanın 3 kasabasında Komratta, Çadırda hem Valkaneştä birdän geçtilär.
“İhtiarlar aalȇrlar, çoyu yok neylän ne ekmek, ne dä bir süt satın alsın. Korkȇrlar, ani kışlayamayaceklar”.
“Gaz peek paalılandı. Bän 2 bin pensiya kablederim. Ne var nicä onunnan alayım, bir ekmek mi, bir süt mü? Nekadar para sa harçlara gider!”.
Mitingın pay alannarı kaldırdılar Prima kasa programasına görä alınmış kreditlerin proţent zeedelenmesini dä.
“Büün Prima kasa programasının payalannarı lääzım 2-3 bin leyä taa zeedä ödesinnär. Siz sade düşünün, ani bu para ayleyä yakışȇr girsin. Bu parayı ayleyä brakamayacez, onu lääzım olacek vermää hükümetin yannışlıkları için”.
Gagauzia Halk Topluşu deputatatı İlya Uzun nışannadı, ani 30 yılın süresindä devlet öndercilerinnän adanan gözäl yaşamak ölä dä yaşayannara etişmedi.
İlya Uzun:“Büün insan düşüner ne var maazalarda hem nesoy kışlayacek. 30 yıllık adamaklar ölä dä aslıya çikmadılar”.
Mitingın kurucuları nışannadılar, ani 3 kasabada meydannara çıktılar 4 bin insandan zeedä.
Mihail Vlah, cümnä aktivisti: “İnsan başladı uyanmaa çünkü duyȇrlar, ani kış yakın. Bizim öndercilerimiz bu iş için hiç düşünmeerlär”.
Mitingın sonunda kabledildi karar vermää kabledilmiş rezolüţiyayı Moldovanın Hukumetinä. Organizatorlar teklif ettilär yaşayannara gelän pazara pay alsınnar biçikleta akţiyasında, angısı Komradın meydanından saat 19-da başlayacek.
Источник grt.md
