Komratlı resimci Larisa Ormanji açtı taa bir resim sergisini eni yaratmalarınnan
Larisa Ormanjinin resimleri sergili Komrat türk bibliotekasında. Bu personal sergisi şansora 4-cü resimcinin yaratma yolunun süresindä. Resim incä zanaatını sevennerä gösterili 34 yaratma, angılarını Larisa yazdı son 2 yılın içindä.
Nicä sölärdi Salvador Dali, resimciya herbir fırçanın diimesi tuvala — bu büük yaşamak draması. Larisa Ormanjının yaradıcılık yolu çeketti çoktan. İdeyaları yazmaa resimneri o alȇr bizim tabiattan, yaşamamızdan, onnarın süjetları olȇrlar lüzgär, gün kauşması yada gün duuması, dinnenän kedi yada kış zamanı. Bakarak resimnerä, duyȇrsın o atmosferayı, angısını avtor istedi bizä duydurmaa. Da herbir resimin var kendi istoriyası, kendi süjetı.
“Konular türlü-türlü, ne biz işideriz her gün, ne bizi dalgalandırȇr, görmää güneşi, siiretmää gözäl tabiatı. Bendä var akvarel, hem var abstrakţıya, angısınnan diil çoktan başladım zanaatlanmaa. En sevilän akvarel. Bir — iki yıl sıradan bu benim çeketmäm, benim en sevän işim”, — paylaşȇr serginin avtoru.
Larisa Ormanjı duudu Kazahstanda, kendisi ukrainka, ama yaşȇr hem yaradȇr Gagauziyada. Kendi yaratmalarında gösterer istoriyayı, bizim erimizi. Onun resimneri yazılı tuvalda hem yaprakta akril, akvarel hem yaa boyalarınnan. Avtor gösterdi te o işleri, angıları yakın bizim canımıza. Da bakıp onun resimnerinä on yıl geeri, var nicä görmää onun professional uurunda ilerlemesini, söleerlär incä zaanat sevenneri.
“Biz göreriz , ani Larisa ilerleer, bakȇr çoyu işlerä başka türlü. Var resimnär, angılarını biz gördük ileri, ama var eni da. Hepsi resimnerdä o açıklȇȇr kendi bakışlarını. Var maasus resimci filosofiyası. Onun resimnerindä var türlü ruh halı, angılarını yaşȇrlar insannar”, — söledi biblioteka zaametçisi Evgeniya Lülenova.
Sergi açılışının herbir musaafirin canına dokundular gösterilän yaratmalar. Yazıcıyı Födor Marinogloyu dalgalandırdı “Yalnızlık” resimi, makar onun bakışına görä hepsi resimnär için var nicä sölemää ii laflar.
Tanışmaa resimcinin yatamalarınnan geldilär onun dostları, kollegaları , angıları büük sevgiylän açıkladılar kendi duygularını.
“Larısa , senin resimnerin vererlär ii duyguları , bän pek beenerim gün kauşmasını, gün duumasını, beenerim dumanı. Da bän resimnerä bakınca, duyȇrım onu. Ne bän geçirdim yaşamada, onu da duyȇrım”, — paylaştı vokal üüredicisi Natalya Kirillovskaya.
Biz var nicä yalnız olalım nicä büük okeanın içindä, da biz yalnız bişey diiştirmeyecez, bölä fikirlär gelerlär, açan bakȇrsın resimcinin abstrakţiya janrasında yazılı resimnarinä. Da bakıp o yaratmalara, herbiri var nicä kursun kendi süjetını, söleer jurnalist Alla Büük.
“Maasus beni meraklandırdı resim, neredä büük balık akula gösterer bizä, ani pek küçüküz büük suda, bu dünnedä, biz yok nicä yalnız bişey diiştirelim. Kalan resimnär açık hem meraklı”, — söledi Alla Büük.
Larisa Ormanjinin yaratmalarını var nicä gelmää siiretmää Komrat türk bibliotekasına.
Источник grt.md
