Komratlı Galina Andrienko kocasının mezarına yanaşık sovet askerlerin adsız mezarlarını tertipleer
Büük Vatan Cengi milionnarlan insanın yaşamasını aldı. Onun kurbannarı taa çok genç insandı. Askerlerin mezarları çok var devlettä. Onnardan kimilerin üztündä ne ad var, ne duuma hem ölüm günneri. Gagauz erindä da bölä var. Komrat mezarlıında iki adsız mezarı tertipleer kasabanın yaşayankası Galina Andrienko.
Galina Andrienko eşini — deniz flotun ofiţerını Vladislav Andrienkoyu 2008 — dä gömdü. Kocasının mezarını sıradakı keret dolaştıynan karı ona yanaşık iki mezarı kırmızı yıldızlarlan tepelerindä esaba aldı. Canı acıdı da aldı kararı elleri-ayakları tutarkana onnarı da tertiplemää. Otları keser, çiçek koyȇr, sulȇr, ki bütün yaz açsınnar. Da bölä artık 13 yıl.
Galina Andrienko bilmer bu mezarlarda gömülü askerlerin adlarını, ama hatır güder onnara.
Cenk başladıynan o bir yaşındaydı. Bobası Nikolay Melniçuk 24 yaşında cengä gitmiş. İki dädusu da bu çirkin olaylara katılmış. Hem da üç uçusu. Birisi onnardan 17 yaşındaymış, ama yalan sölemiş, ani 19 tamannadı deyni onu cengä braksınnar.
“O istardi faydalı olmaa, aylesini, ana topraanı duşmannardan koorumaa”, — getirdeer akılına Galina Nikolaevna.
Biri dä, ne bobası, ne däduları, ne da uyçuları evä cenktän dönmedilär.
“Onnarın da neredä sa mezarları var. Kim sa bekim tertipler”, — umutlan söler yaşlı kaarı.
Cenktä pay aldı onun lelüsu da, bobasının kızkardaşı – Anna Melniçük. O asker doktoruydu.
“Yaralanmış askerleri düüştän çıkararkana o kendisi da yaralanȇr. Onun kalbinä yakın demir kıymık razgeler. Çıkaramȇrlar. Onunnan lelüm 2 yıl yaşadı. 1946-cidä geçindi”, — annattı Galina Nikolaevna.
O büük dalgalanmaklan canında Enseiş Gününü karşılȇȇr.
Yaşlı karı teklif eder onun gibi askerlerin mezarlarını tertiplemää.
“Bu bir hatır. Bu bir şükürlük”, — söler Galina Nikolaevna.
İkinci Dünnä cengindä enseyiştän şansora 77 yıl geçti.
Источник grt.md
