Komrat universitetin studentlerinä annattılar Evropa Birliin bir payı olmak nedir
Moldovada Halklararası respublika institudu ofisin başı Kşiştof Lisek buluştu Komrat devlet universitetin studentlerinnän. O annattı gençlerä Evropa Birliinä integraţiyasının faydası için.
Moldovada Halklararası respublika institudu ofisin başı Kşiştof Lisek studentlerä annattı lekţiyasını temaya: “Evropaya integraţiya: Evropa Birliin azası olmak nedir”. Kşiştof Lisek lafedärdi englez dilindä dä studentlär onu annardılar. Musaafir annattı, angı faydaları hem garantiyaları verer Evropa Birlii ona girän devletlerä.
Lekţiya bittiynän studenlär kendi soruşlarını sordular. Studentlerin biri sordu, ne faydayı kazanȇr Evropa Birlii Moldovaya hem Gagauziyaya ilerlemäk için para verärkana.
«Evropa Birlii bezbelli umutlanȇr, ani Moldova onun bir payi olacek. Evropa Birliin politikası butakım kurulu – yardım etmää devletlerä, angıları gelecektä Evropa Birliinä gireceklär», — cevapladı Kşiştof Lisek.
Gagauziya Başkanı İrina Vlah çizgiledi Evropa Birliinnän barabar çalışmaların faydalarını.
«Onnar [Evropa Birlii] için pek önemli her taraftan ilerlemäk. Hem bän pek beenerim onnarın yardımını küçük halklara. Er biz gagauzlar kendi — kendimizä zaamet etmärsaydık, biz başarlı olmayacez. Evropa Birlii çok yardım eder ki gençlär kaliteli üürensinnär”, — nışannadı İrina Vlah.
Kimi studentlar Evropa Birliin türlü devletlerinä gittilär. Onnar paylaştılar, ani Evopayı pek beendilär.
Moldova Evropa Birliin azası olmak için kandidat statusunu kabletti Kirez ayin 23 – dä. Ama insannarın düşünmekleri bunu için diil birtürlü. Onuştan alındı karar annatmaa studentlara Evropa Birliinä girmäk faydaları için.
«Gagauziya Moldovanın bir payıdır. Biz institut olarak işleriz respublikanızda umutlan, ani o bir gün Evropa Birliin bir payı olacek. Biz isteriz insannar nekadar taa çok lääzım bilsinär Evropa Birlii için”, — söledi Moldovada Halklararası respublika institudu ofisin başı Kşiştof Lisek.
Sora İrina Vlah hem Kşiştof Lisek uuradılar Komrattakı Dmitriy Mavrodi adına liţeyinä. Orada 3-cü klasta geçti resimcilik dersi gagauz dilindä.
Источник grt.md 12.12.2022