Komrat Kultura evi kutladı uşakları hazırlayıp onnara türlü meraklı olayları
Komrat Kultura evi, Muzika-dramatika teatrusu hem primariya geçirdilär Uşakları korumak yortusunu. Kultura evin önündä uşaklara deyni hazırladılar batutları, agvagrim hem konkurslar geçirildi.
Yortu, angısı adalıydi Uşakları korumak gününä, başladı Kultura evin önündä konkurslardan hem resimnerdän asfalt üzündä. Uşaklar paylaştılar en ii duygularlan.
“Biz hazırlȇȇrız yortuyu devletin hem kasabanın en sevgili yaşayannarımıza deyni. Çalışȇrız, ki uşaklar tutsunnar bu günü aklılarında. Ko onnar olsunnar en kısmetli”.
“Büün bizim yortumuz, biz hazırladık uşaklara konkursları, ki onnar dinnensinnär”.
Kultura evin başı Marina Manjul nışannadı, ani kirez ayın biri uşaklara deyni en şen yortu, onu hepsi büük istemeklän bekleerlär.
“Bu gün biz kutlȇȇrız hepsi kuçuk yaşayannarı. Biz hazırladık gözäl programayı. Uşaklar işideceklär eni turküleri, göreceklär oyunnar, olacek konkurslar”, -söledi Marina Manjul.
Yortuya katıldılar Komrat muzika – drama teatrusunun aktörları.
“Büün hepsi çalışȇrlar, ki kasabamızın en küçük yaşayannarı şen olsunnar hem kısmetli. Büün onnarın günü”, — nışannadı teatro oyunüsü Sergey Arnaut.
Uşaklara deyni geçirildi türlü yarışmaklar.
“İki rebusun cuvaplarını lääzım bulsunnar, Ko şennensinnär, resimnesinnär, kaçınsınnar. Onnarı ileri dooru bekleer yaz hem dinnenmäk vakıdı”, — açıkladı teatro oyunüsü Anna Terzi.
Uşaklar sevindilär yortuya analarlan – bobalarlan barabar.
“ Biz geldik burayı oynamaa hem tatlı baaşışları daatmaa”.
“Bän isteerim geçirmää vakıdı dostlarlan, analarlan — bobalarlan hem yakın insannarlan”.
Olayın hepsi musaafirlerinä uşaklar, angıları Kultura evindä yaradıcılık sekţiyasına gelerlär, gösterdilär konţerti.
Источник grt.md 01.06.2022