Komradın parkında içmäk su sızıntısı genä işleer
Komrat kasabasının merkez parkında şindiki içmäk su sızıntısı buluinȇr eski pınarın erindä. Her yıl ilkyazıdan güzädän yaşayannarın vardı kolaylıkları bu suyu parasız içmää. Bu yıl bu su sızıntısı taa kirez ayın ortasında koşuldu. Angı sebeplerä görä, aaraştırdı GRT kanalın çekim grupası.
Yaz vakıdı insanı sıcaklan sevindirer. Ama açan olȇr pek sıcak, çoyu zeetlener susuzluktan. Taazä suyu merkezdä bulunan insannar vardı nicä içsinnär parkta bulunan sızıntıdan. Bu yıl bu sızıntı pek geç işlemää başladı. Komradın primarı Sergey Anastasov açıkladı, ani sızıntı işlemääzdi kırıkların beterinä.
Yoketmää tehnika problemalarını kolaymış. Çekim grupamızın primariyaya danışmasından bir saat sora uzmannar düzdülär sızıntının kırık krannarını da su geldi. İnsanın, kim o vakıt oradaydı, taazä su içmää kolayı oldu.
“Bu su nicä soluk. Bekim bir hasta insan, angısında yok parası, yaklaştı da içti. İslää, ani filcan yanımdaydı. Pek ii, ani düzdülär onu”.
“Herbiri, kim istedi yaklaştı da içti. Paraylan su almaa bana para etişmer, pensiyam sade1 500 bin ley. Orada da kran bir afta işler, üz işlämer”.
“Ani 10 ley su için vermää, taa ii bir stakan su buradan içmää. Lääzım açık olsun”.
Primar urguladı, ani Komradın yaşayannarı suyu gecä — gündüz kullanabileceklär. Su sızıntısı parkta ilk ayazlaradan işleyecek. Bundan kaarä o annattı, ani Galaţan sokaanda da remont işlerindän sora düzüldü hem paklanıldı fontan, angısı hep yakınnarda işlemää başlayacek.
Источник grt.md 15.06.2022