Kıymetli insannara Gagauziya ödülleri verildi
Kırım ayın 22-dä, Moldova Parlamentı tarafından 1994-cü yılın Kırım ayın (dekabri) 23-dä “Gagauziya (Gagauz Yeri) özel hak statusu için” Zakonun kabledilmesinin 28-ci yıldönümünä karşı, Komrat Kultura binasında oldu yortulu sıra, neredä Gagauziyanın öndercileri verdilär üzdän zeedä avtonomiyanın ödüllerini Gagauziyanın kurucu veterannarına, vraçlara hem üüredicilerä, çiftçilik zaametçilerinä, bilim hem kultura insannarına, devlet işçilerinä.
Verilän ödüllerin arasında vardılar: “Gagauz Yeri” Ordenı, “Mihail ÇAKİR” Ordenı, “Gagauziyanın şannı Vatandaşı”, “Gagauziyanın kıymetli kultura zaametçisi”, “Gagauziyanın kıymetli pedagogu”, “Gagauziyanın kıymetli mediţina zaametçisi”, “Gagauziyanın kıymetli çiftçilik zaametçisi”, “Gagauziyanın kıymetli içişleri organnarı zaametçisi” nışannarı hem “Gagauziya Başkanın hem Halk Topluşun Gramotası”.
Ödül vermä yortulu sıranın sonunda Gagauziya Başkankası İrina VLAH hem Gagauziya Halk Topluşu Başı Dimitriy KONSTANTİNOV kutladılar eni ödül kabledenneri Gagauziya (Gagauz Yeri) avtonomiyanın 28-ci yıldönümünnän.
Ödül kabledennerin arasında vardı “Ana Sözü” gazetasının Baş redaktoru, akademik, poet, yazıcı, folklorcu, dramaturg, publțist, “Gagauz Milli Gimnası”nın avtoru Todur ZANET ta, angısı “çok yıllar bilim hem yaratmak zaametleri, üüsek profesionalizması hem kendi işinä candan baalılıı için, gagauz dilin hem literaturasının diriltmesi, ilelrletmesi hem koruması izmetindä büük yararlar göstermesi için, avtonomiyanın politika hem hakk uurunda temelleşmesindä büük hem önemni katkıda bulunması hem aktiv pay alması için, çetin vatandaşlık pozițiyası için” verildi “Gagauz Yeri” Ordenı.
Hepsinä kutluca olsun!
Источник anasozu.com 24.12.2022