“Kiyatlan aydınaa” Türkiye Bartın kiyat pazarı
2021-ci yılın Kasım ayın 25 – Kırım ayın 1-ri arasında Türkiyenin Bartın belediyesi (primariyası) tarafından düzennenän “Kiyatlan aydınaa” sözleri altında “24-cü Halklararası kiyat pazarı” (“24. Uluslararası Kitap Fuarı”) [birincisi 1997-ci yılda olmuş] geçti, nereyi 10 yayın evi katıldı hem kiyat sevän insannara 10 zeedä yazıcıylan buluşma yapıldı hem imza günneri oldu.
Bartın belediyesi (primariyası) buyur edilmesinä görä bu kiyat pazarına gagauz yazıcısı Todur ZANET ta katıldı, angısının iki kiyadı “Avrasya Yazarlar Birliin “Bengü” yayınnarı sergi bölümündä tanıdıldı. Kiyatların birisi – “Aaçlık kurbannarı” dramaturgiya kiyadın Türkiyedä II-ci baskısı, ani 2020-ci yılın Orak ayın (iyül) 29-da tiparlandıydı. İkinci kiyatta, maasuz “24-cü Halklararası kiyat pazarı” için hazırlanan hem Kasımın 30-da “Bengü” yayın evindän çıkan “Ana Sözü” adlı 230 sayfalık peet kiyadı. İki kiyadın da baş redaktoru “Avrasya Yazarlar Birlii” Başkanı Yakup ÖMEROGLU.
Yazıcılarlan buluşmaların hepsinin kendi temaları vardı. Yazıcı Todur ZANET kiyat sevän insannarlan “Vatan sevgisi” temasında dialog kurdu, gagauzlar için annattı hem konuylan ilgili peetlerini okudu. Vatan sevgisini yazıcı bölä açıkladı: “Vatan – bu diil bir boş söz hem diil şişirmä bir şişiriga. Vatan o er, ani seni duudurdu, etiştirdi hem adam yaptı. Açan deerlär, ani lääzım Vatana izmet etmää, kuvettä bulunannar bunu annêêrlar – onnara izmet. Bän sa sayêrım hem insan da annêêr onu ölä: izmet anaya-bobaya hem uşaklara, Ana topraamıza hem boba evimizä, izmet hergünkü bizim ekmeemizä – Ana dilimizä, Gagauzluumuza, insannıımıza hem adamnıımıza”.
Bartında olan kiyat pazarı için hem bartınnılar için Todur ZANET bölä dedi: “Ne pek gözäl bir kasaba! Ne tatlı insannar, sıcak cannılar! Kendimi sansın gagauziyanın bir küüyündä olarak raat duydum. Saa olsunnar hepsi kim bu pazarı hazırlamış hem saa olsunnar, ani bana da saydılar hem orayı katılmaa buyur ettilär. Saa olsunnar, ani ölä gözäl bizi karşladılar. Bän da saydım da katıldım”.
Buluşmada pay aldılar bartınnılar, Bartın belediyesi Başkan yardımcısı Erol DEMİRKOPARANOĞLU hem belediyenin zaametçileri.
Ayırıca “24-cü Halklararası kiyat pazarı”na katılması için Todur ZANET Bartın belediyesi Başkannından Cemal AKINdan şükür mesajı kabletti.
PATRETLERDÄ:
“24-cü Halklararası kiyat pazarı”n afişası.
Источник anasozu.com
