Kışlamaa pek zor olacek. Nesoy yardım insan devlettän kabledecek.
MD orezidenti Maya Sandu Devlet büceti kanonuna diyşilmekleri imzaladı. Bu diyşilmeklerä görä yaşayannara yardım verilecek. Yardımnarın sayısında bulunȇrlar paaların üüselmesi için kompensaţiyalar da.
Bu diyşilmeklerä görä pensionerlär, kimin pensiyaları 5000 leydän taa az, kabledeceklär birär buçuk bin ley yardım. Yaşayannar ama söleerlär, ani bukadar para yardım etmeyecek kıştan çıkmaa.
— “Onnar etmeyeceklär. Adetça her yıl güzün pensiyaları zeedeledärdilär, şindi sa bu yardımı vereceymişlär. Sanȇȇrım, ani bunu yapȇrlar insanın gözünü boyamaa deyni”.
— “Odunun paası 2000 ley, var mı nicä etsin bukadar para? Bu diil dooru, taa islää gazın paası için annaşsınnar”.
— “Ne o 1buçuk bin ley, açan bir kub odunnan bir afta sade yısınmaa var nicä. Ötää dooru ne? Bu diil dooru. Biz 40 yıl işledik”.
Ekonomika uurunda uzman Galina Şelar nışannadı, ani bu finansların verilmesi yardım etmeyecek soruşu çözmää.
GALİNA ŞELAR ekonomika uurunda uzman : — “Yaşayannarın çoyuna deyni kışın gelmesi-büük bir kahır. Uzmannar büün şansora söleerlär, ani kışın yaşayannarın taa çoyu gazı ödeyämeyceklär. Biz büün taa annamȇȇrız, neyi isteeriz. İsteeriz mi üşümää, osa istämeeriz mi”.
Bu yardımı canavar ayın 1-dän yaşayannara başlayaceklar vermää.
Источник grt.md
