Kişinevda gagauz yortusu hem 25-ci kadr
Çiçek ayın 6-da Kişinevun “Nikolay SULAK Milli Palatası”nda oldu “Gagauziyayı kulturadan tanı” (“Descoperӑ Gӑgӑuzia prin culturӑ”) adlı bir yortu, neredä gagauzların kulturasını kişinevlulara gösterdilär hem tanıttılar.
Konțertin önündä siiredicilerä deyni gagauz milli kostümnarın gösterisi oldu, çeşitli master-klaslar yapıldı, resim hem kilim sergisi düzennendi. Ayrıca gelenneri karşladılar gagauz folklor ansamblileri “Bucaktan kızlar” (Çadır kasabası), “Sevda” (Kazayak küüyü) hem “Çancaaz” (Aydar küüyü).
“Gagauziyayı kulturadan tanı” (“Descoperӑ Gӑgӑuzia prin culturӑ”) adlı yortunun özü oldu “Nikolay SULAK Milli Palatası”nın sțensında büük bir konțert programası, angısında pay aldılar Gagauziyanın türkü hem oyun ansamblileri “Düz Ava” hem “Kadınca”, oyun ansamblileri “Аltın Çöşmä” hem “Yıldızlar”. Bundan kaarä sțenada çaldılar anılmış gagauz türkücüleri Andrey İVANOV, Tatyana MİTİOGLU, İvan BABOV, Sergey İVANOV, “Kolay” vokal şkolası, Yuliya ARNAUT, “Koray aylesi”, Olga PAÇİ, Elena PAÇİ, Valentin ORMANCI, Marina KISSA, İlya hem Evdokiya KÖSÄ, Viktoriya ARNAUT, İrina DRAGU, Dimitriy KADIN, Natali DENİZ hem Komrat kasabasının Uşak yaratmak evin vokal kolektivı, “Tozi” duetı, “Kolay sesleri” vokal grupası, Vitaliy MANJUL, Pötr PETKOVİÇ.
Selemnemä sözünnän yortuda bulunnanara danıştılar Gagauziya Başkankası İrina VLAH hem Kişinev primarın yardımcısı.
Makarki açıklandı, ani “Gagauziyayı kulturadan tanı” (“Descoperӑ Gӑgӑuzia prin culturӑ”) adlı sıranın keezi – gagauz kulturasını milli uurunda göstermäk, bir minudada hiç brakmardı şüpä ki yortunun 25-ci kadrası da vardı – politikacı İrina VLAHa gelecek için reklaması. Çünkü, türkülär çalınarkan, arkadakı may hepsi vidiolarda Canabisi ön plandaydı.
Fotolar: Todur ZANET hem facebook.com/vlahmd.
Источник anasozu.com 07.04.2023