Kiriet küüyüdä var büük problema paranın etmemesinän yolları düzümää deyni
Kiriet küüyüdä, bakmayarak erli kuvetlerin zaametlerinä düzmää yolları nicä küü içindä, ölä da dışansında, var problemnär bu uurda baalı para etmemezliinnän.
Komrat tarafından yol hem respublika trasası, angısı baalȇr küüyü dolaylan, hem Kişnova dooru götürän yol, 30 yılın içindä düzülmedilär. Bir yıl geeri yapıldı Çadırdan Tvardiţaya kadar yol büük bir proektä görä. Ama Kiriet küüyünädän işlär etişmedilär. Hepsi ölä da kaldı, söler küün primarı Valentina Kaykı.
“Yol islää, var kolaylık dolay merkezinä etişmää. Ama bizim yaşayannarımız için bu pek aaz, neçin ki küüyüdän Tvardiţaya dooru yol pek prost. Da onu yapmêêrlar. Bezbelli, ne bu yıl, ne da gelän yıla genä bişey olmayacêk, neçin ki esaba alêrlar sade o yolları, angıları taa yakın Komrada hem Çadıra”, — açıkladı Gagauz Radiosuna küüyün başı.
Prost havada, açan yaamur yada kaar yayêr, yollar pek bozulêrlar, da onnardan geçmää hiç yok nasıl.
“Hızlı medik yardımı da etişämeer hastaya. İnsan kendi evindän çıkamêê bolniţaya gitmää yada kendi işlerini yapmaa. Prost yollar — da bu en büük problema bizdä küüyüdä. Umutlanêrım, ani bizi işideceklär da ne sa diişecek”, — umutlanȇr Valentina Kaykı.
Küüyülerdä erli kuvetlär savaşêrlar kendi kuvedinä görä düzmää yol infrastrukturasını. Bu yıl devletin yol fondundan Kiriet küüyünä verildi 600 bin ley, annattı Valentina Kaykı.
“Küü sovetin kararına görä bu paralar verildi Kotovskiy sokaana çakal döşensin. Biz hazırlêêrız smetayi da umutlanêrız, ani o teezlä bizdä olacêk. Ama paa kalkmasının beterinä var nasıl proekttä diişilmeklär olsun. Bunun için düşünecez ne yapmaa”, — annattı küüyün başı.
Kirietin merkez sokaanda asfalt döşeli, ama onu da lääzım şansora düzmää.
“Onu her yıl yamêêrlar, neredä yol bozuklukları var. Küüyüdä var islää yol, angısı yapıldı gimnaziyaya hem uşak başçasına dooru. Ama bu paraları biz birkaç yıl topladık hem da vardı “İslää yollar” programası. Da bu paralarlan yaptık islää yolu soţial obyektlerä dooru. Bundan kaarä küü merkezinnän baaladık bir mikrorayonu”, — haberledi Valentina Kaykı.
Yapıldı taa bir yol küüyüdä, saalık merkezinä dooru. Orada bruşçatka konuldu hem da akan suyu doorudan tertiplär, annattı Valentina Kaykı.
“Hep islää proekt. Bu yıl umutlanardık, ani proektlerin arasında, angılarını avtonomiyanın ilelremäk agenstvosu giriştirecek, olacêk yol düzülmesinnän baalı proekt. Ama yok, neçin ki yol fondundan primariyalara veriler100% paralar. Ama bu pek aaz bukadar yollar için”, — söledi Kiriet küüyünün primarı.
Kiriet küüyüdä 25 kilometra yol var. Onnardan üç buçuk kilometra — o respublika uurunda yollar, kalan erli. Onnardan da 17, 5 kilometra — toprak yolları, angılarını lääzım düzmää.
Источник grt.md 30.05.2022