Kırgızstan halk poetı Omor SULTANOV sonsuzlaa vardı
2022-ci yılın Çiçek ayın (aprel) 3-dä sonsuzlaa vardı Kırgızstan halk poetı, romanistı, yazıcısı, sţenaristı, çevirici, cümne insanı Omor Sultanoviç SULTANOV. Canabizinin raametli olması için kara haberi bana getirdi gagauzların büük dostu, anılmış kırgız yazıcısı hem kırgız literaturasının diri klasii Aydarbek SARMANBETOV.
Kırgızstan halk poetı, kırgız hem türk literaturasının klasii hem mêtrı Omor Sultanoviç SULTANOV duudu 1935-ci yılın Kasımın 6-da. Kirgiz literaturasına Canabisi girdi XX-ci üzyılın 50-60 yılların kertiindä. 1961-ci yılda çıktı onun ilk peet kiyadı “Bayırlar günneri”. Bu kiyadın ardına çıktı taa birkaç peet toplumu, “Maavi gök, ak yol” povesti, sora da peydalandı “Büük derä”, “Okeana yol”, “Yorgunnun üzüncü türküsü”, “Öz №” kiyatları. Bundan kaarä, Omor SULTANOV yazdı birkaç sțenariy kinolara hem dokemental filmnerä. Türk dünnäsının hem dünnäyın en islää petların en isleylerini seçmää deyni Kırgız Respublikasının Omor SULTANOV Halklararası cümne poeziya Akademiyasını kurdu.
2015 yılda Türk dünäsında Omor SULTANOV yılın literatura adamı seçildi hem o yıl türk dilli memleketlerdä Omor SULTANOVun yılı oldu.
Mêtrı Omor SULTANOV Kırgızıstanın çok ordennarınnan hem medalilerinnän ödüllendi. Bundan kaarä, türk dünnääsının hem başka halkararası sayısız ödül nışannarı kabletti.
Omor SULTANOVun yaratmaları, gagauz dilindän kaarä, çevirildi türkçeyä, rusçaya, angliycaya, nemţeyceyä, ispancaya, poläkçasına, vengercaya, mongolcaya hem başka dillerä.
Kal saalıcaklan hem raat dinnen, Mêtr! Topracıın ilin olsun! Göktä Boba Seni saa tarafa kabletsin! Biz da yaşayalaım hem analım. Yakınnarınıza hem aylenizä acızgannıımızı bildirerim.
Senin dostun Todur ZANET.
Источник anasozu.com
