Kıpçakta eni proekta görä plastmastan gübürleri ayırı toplayaceklar
“Kıpçak küüyün cümnä izmetlerinin eniletmesi, geçirip çetin gübürleri” proekt geliştiriler küüdä. Yaşayannar kabledeceklär konteynerları, da olacek kolaylıkları ayırmaa plastması hem mışamaları sıbıdarkana. Butakım proektta bakılı kazançlar da gübürlerdän, angıları yardım edecklär düzmää sokakları.
Bu proektın bütün paası kurêr 32 bin dollar. Bu sayının içinä girer donorların grantı, primariyanın hem Bakannık komitetının kontribuţiyaları, yaşayannarın payı.
ANATOLİY TALMAÇ Kıpçak küüyün primarın yardımcısı: “Biz taradık büük proektı PROON kurumundan. Koşullar zordu, ama şindi yakın 120 konteyner erleştirecez küüdä, ani yaşayannar plastikleri hem mışamaları ayırı sıbıtsınnar”.
Proektın çerçevesindä donorların hem vatandaşların yardımınnan plannara koyuldu satın almaa yakın 30 konteyner. Nicä nışannadı Anatoliy Talmaç, yakınnarda neetleniler katılmaa taa proektlara, angılarına görä olsun kolaylık satın almaa tedarlıkları plastik kıyması için. Kıyılmış gübürlerdän dä yapmaa çuvalları küüyün hem primariyanın kullanması için.Olmasın çok zännık.
ANATOLİY TALMAÇ Kıpçak küüyün primarın yardımcısı: “Biz savaşacez insannarın havezlerini uyandırmaa, ki katılsınnar bu proektlara, ani kendileri, toplayıp gübürleri ayırsınnar. Angı maalä en çok plastik hem mışama ayıracek, onun da sokaanda düzüntücülük işlerini geçirecez, zerä onnar taa çok para getireceklär, bu da bir, deyecez, kontribuţiya yaşayannardan”.
Plastik geçirmesi deyni kurmaa ikinci materialı, var nasıl olsun çuvallar yada başka materiallar. Plastmas eriyer üzlärlän yıl. Kıpçak yaşayannarı aalaşêrlar, ani mışamlar büük lüzgärlarda küü kenarından aullarda aaçalarda sarılêrlar.
Her yıl herbir kişi dünnedä yakın 50 kila plstamas kullanıp atêr.Taa çoyu onnardan plastik şişeleri hem imäk taraları mışamadan. Bundan kaarä hep ölä gübürlär atılêrlar zavodlardan da. O üzerä bütün dünnedä en büük gübür tepeleri diziler plastmastan, ne kurêr 100 milion ton.
Источник grt.md
