Kıpçakta «Bucaan çalan Yıldızı-22» vokal yarışması geçti
«Bucaan çalan yıldızı» muzika vokal konkursu geçti Kıpçak küüyün kultura evindä. Konkursta pay aldılar talantlı türkücülär Gagaziyadan hem Tarakliya kasabasından.
Çiçek ayın 21-dä hem 22-dä Kıpçak küüyün kultura evindä iki etaplan geçti «Bucaan çalan yıldızı» vokal konkursu. Onda pay aldı türkücülär 6 yaşından 21 yaşınadan. Onnar annattılar, ani büük sevinmeliklän, hodulluklan geldilär pay almaa bu muzika yortusunda.
«Düşünmäzdim, ani nesoysa eri alacam. Ama bän pek hodulluydum, pek şendim. Bän halizdän büük havezlän pay aldım konkusta. Sayêrım, ani bölä konkurslar pek lääzımnı, onuştan lääzım onnarı ilerletmää. Hepsinä isteerim sölemää, ki gitsinnär ileri, durgunmasınnar, sadece ölä hepsi olacek», — nışannadı Gran-pri ödülcüsü Tarakliyadan Anastasiya Olifiroviç.
«Hep lääzım pay almaa konkurslarda, ama düşünmemää, ani nesoysa eri alacan. Lääzım göstermää hepsini, neyä üürendik, bütün talantımızı. Çalarkan dill lääzım korkmaa, kimdä dä ne olmadı, hiç kahırlanmamaa, başınızı kaldırıp, ileri gitmää», — nışannadı ilk eri kazanan Anna Kostin hep Tarakliyadan.
Üüredicilär, kim geldi kendi ürenicilerinnän, sayêrlar, ani bölä konkurslar pek lääzımnı. Çünkü onnar yardım ederlar üürenmää kardaş halkların folklorunu, adetlerini.
«Bölä konkurslar çok önemli. Onnar tanıştırêr bizi kardaş halkların folklorunnan, adetlerinnän. Biz Tarakliya kasabasından geldik burayı, bizä önemli ki bizim kardaş halkını gagauzları üürenmää hem bizim Bulgar foklorunu göstermää», — açıkladı Tarakliya kasabasının vokal gruppanın öndercisi Anna Voitoviç.
Konkursun jüri azaları notalardılar vokalistlerin talatlarını herbir taraftan. Gagauziyanın şannı artistı Valentin Ormanji seviner, ani Gagauziyada var çok talantlı uşaklar. O nışannadı, ani lääzım destek olmaa onnara.
“Bän pek sevinerim, ani Gagaziyada bölä konkurslar geçer. İnsannar da, halkımız da üürener, ani Gagaziyada var çok talantlı uşaklar, gençlär, angıları ötää dooru bizim kulturamızı götüreçeklär. Onuştan bän da sevinerim, ani bän burada pay alêrım juri azası olarak. Sanêrım, ani ötää dooru da hep bu konkurslar geçecek, çünkü uşaklara lääzım destek olmaa. Bizim elimizän ne geler yardım edecez”, — söledi Valentin Ormanji.
Kıpçak küüyü kultura evin başı Anna Kopuşu annatı, nicä kuruldu muzika konkursu.
«Bu konkursu biz çekettik geçirmää 2018-dän regional uurunda. İlkin biz onu geçirärdik küü uurunda, bizim küüdän vokalistlär pay alardılar bu konkursta. Sora istedik taa genişlettirmää, taa büük, üüsek uura onu kaldırmaa. Onuştan regional kultura evlerinä danıştık. Ozamandan beeri, 2018-dän büünkü günädän bizä geler herbir küüdän, var nica demää, en aaz 9 küüdän her yıl bu konkursa vokalistlär», — açıkladı Anna Kopuşu.
Küçük pay alannarın grupasında ilk eri aldı Vladimir Kösä Beşalma küüyündän, ikinci — Marina Terzi Djoltaydan, üçüncü oldu Ekaterina Kopuşu Tarakliyadan.
Orta grupada en ii payalan oldu Kaleriya Kolpakçi Kıpçaktan, ikinci – Mariya Bogdan Beşalmadan, üçüncü eri aldı Dmitriy Çolak Kıpçaktan.
Büük grupadan payalannarın arasında ilk eri aldı Anna Kostin Tarakliyadan, ikinci oldu Olga Kapsamun Tomaydan, üçüncü eri aldı Mariya Kol Çadırdan.
Hepsi uşaklara, kim aldı erleri, hem onnarın üüredicilerinä verildi gramotalar hem para baaşışları.
Источник grt.md
