KDU – tin studentları aaraştırdılar erli fabrikalarınnan satılan yımırtaların kalitesini
Erli panayırda yımırtaların kalitesini üürenerlär Komrat devlet universitetindä Agrar fakultetin studentleri hem aspirantlar. Onnara hazırladılar degustaţiyayı, angısı yapıldı Florenı hem Komrat tauk fermalarında satılan yımırtalarına. Studentlar sayȇrlar, ani herzaman lääzım aaraştırmaa malların kalitesini. Degustaţiyada bulundu bizim korespondent.
Bütün dünnedä büünkü gün aarȇrlar eni beslemäk komponentlarını, angılarını katȇrlar tauk eminä, ne verecek kolaylık tauk büüdärkana kabletmää kaliteli yımırtaları. 10 türlü tauk yımırtasını verdilär degustaţiyaya ekspertlerä.
“Degustaţiyanın sırasında belli ederiz malların kalitesini. Da ona görä belli olacek, ne yapmaa deyni kabletmää kaliteli malları”, — açıkladı ANSA kurumun baş inspektoru Lübomir Vartanän.
Degustaţiyanın pay alannarı nışannadılar, ani aaraştırmanın başarmasından sora lääzım vermää nasaatları insannara, kim büüder piliç hem tauk fabrikalarında.
“Bütün dünnedä aarȇrlar ekonomika tarafından ii komponentları katmaa deyni taukların yada başka hayvannarın eminä”, — söledi Sergey Kara, KDU agrar fakultetin dekanı.
“Kaliteli em verecek kolaylık zeedeletmää kuşların hem yımırtaların sayısını. Ama olmasın taa çok harcamaklar, olsun bizä faydalı da”, — nışanadı KDU aspirantı Alla Kara.
Komrat piliç fabrikasının başı Vladimir Kılçik çizgiledi bu aaraştırmanın önemliini.
“Bizim bakışımıza görä bu meraklı eksperement, gördük neylän ayırılȇrlar 10 alınmış yımırta. İlk baktıınan, onnar birtürlü, datları benzeşerlär, ama başka taraflardan ayırılȇrlar. Da açan çekedersin datmaa onnarı, annȇrsın, ani onnar diil birtürlü”, — söledi o.
KDU — dä ileri dooru plana koydular geçirmää aaraştırmaları yaanının hem şarap malların kalitesindä.
Источник grt.md
