KDU studentleri Rumıniyada hem Bulgariyada eni bilgileri kablettilär
ERASMUS+ programasının sınırlarında KDU üüredicileri hem studentleri Rumıniya hem Bulgariya devletlerindä bulundular. Dönüp evä onnar kendi duygularınnan hem düşünmeklerinnän paylaştılar. Hazırlamaa lääzımnı dokumentleri hem annaşmakları studentlerlä yardım etti KDU halklararası annaşmaklarında ofisı.
Kolaylıkları, angılarını katılıp ERASMUS+ programasına veriler, KDU üüredicileri hem studentleri diil bi yıl biler. Bu programaya görä universitetin temsilcileri türlü devletlerdä bulundular. Bu yıl yakın 20 üürenici Bulgariyaya gittilär, üç üüredici hem iki student — Rumıniyaya. Üüredicilär nışannȇrlar, ki pay almak bu takım üürenmäk programalarında verer kolaylık kabletmää praktikada eni bilgileri türlü bölümnerdä.
“Studentlär şindän sora ikinci sıra Bulgariyaya giderlär. İlk sıra bıldır yazın gittiydilär. Bu yıl da ilerlettilär üürenmeklerini”, — haberledi KDU ekonomika kafedrasının başı Svetlana Kuraksina.
“Önemli, ani biz savaşȇrız bulmaa investorları, neçin ki onnar yardım ederlär gitmää aşırıya studentlerä, aaraştırmak işlerini yapmaa. İi ani biz bunu becereriz da yapȇrız”, — nışannadı KDU üüredicisi Svetlana Genova.
Hızlı hazırlamaa lääzımnı dokumentleri, imzalamaa annaşmakları studentlerä yardım etti KDU halklararası annaşmaklarında ofis, angısı dil çoktan universitettä açıldı.
“Bizim ofisımız aprel ayında açıldı. Biz savaşȇrız aktiv işlemää universitelän barabar türlü programalarlan diil sade Erasmuslan, ama çok başkalarınnan da”, — açıkladı KDU Uluslararası ilişkiler koordinatorun yardımcısı Alöna Kurdoglo.
Studentlär bulunmaa Rumıniyada hem Bulgariyada sevindilär. Pek faydalı görmää kendi gözlerinnän, nesoy çalışȇrlşar uzmannar türlü bölümnerdä başka devletlerdä, sayȇrlar onnar.
“Mobil programasına görä Rumıniyada bulundum. Aftanın süresindä lääzımdı urok ta verim, tanışım universitedin işinnän hem kurulmasınnan”, — annattı Tatyana Velikova, KDU üüredicisi.
“Bulgariyada bulunduk. Tanıştık eni proektlärlän, onnar yardım edecek bizä eni kabledilän bilgileri kullanmaa ileri dooru”, — açıkladı Daniil Ketraru, KDU studenti.
“Rumıniyaya gittik. Svetlana Genova proektini belli etti baalı şarap marşrutunnan iki devlet arasında. Gittik vinzavoda da, neredä gördük, nesoy orada şaraplar hazırlanȇr”, — annattı Natalya Stoyanova, KDU studenti.
Hep bu programaya görä yakın vakıtlarda Rumıniya devletindä temsilcilär geleceklär Gagauziyaya KDU-nä hem tanışaceklar bütünnä avtonomiyanın kulturasınnan.
Источник grt.md 02.06.2022